గుడ్ న్యూస్: ఆటోమేషన్‌తో జాబ్ లాస్ తక్కువే, అనుకున్నంత ప్రమాదమేమీ లేదు

45 లక్షల మంది నిపుణులు...

ఇండియా లో ఐటీ సేవల రంగం చాలా అభివృద్ధి చెందింది. మన దేశ ఐటీ పరిశ్రమ పరిమాణం 180 బిలియన్ డాలర్ల (సుమారు రూ 12.60 లక్షల కోట్లు) స్థాయికి చేరుకొంది. ఈ రంగం ఏకంగా 45 లక్షల మంది ఐటీ నిపుణులకు ఉపాధి కల్పిస్తోంది. పరోక్షంగా సుమారు 2 కోట్ల మంది ఈ రంగంపై ఆధారపడి జీవనం సాగిస్తున్నారు. అందుకే, ఈ రంగంలో వచ్చే కొత్త పరిణామాలు దేశంలో లక్షల మందిపై ప్రత్యక్షంగా ప్రభావం చూపుతుంది. 2008 ఆర్ధిక సంక్షోభం సమయంలో అది స్పష్టమైంది కూడా. అందుకే, ఆటోమేషన్ వంటి కొత్త తరహా ప్రాసెస్ వల్ల సంభవించే మార్పులపై కొంత కాలంగా విపరీతమైన చర్చ జరుగుతోంది.

ప్రభావం 10 శాతం లోపే...

ఐటీ , బీపీఓ రంగాల్లో ప్రాసెస్ ఆటోమేషన్ చేయడం వల్ల భయపడినంత ఉద్యోగాలు ఏమీ పోవని... ఆటోమేషన్ ప్రభావం 10% లోపే ఉంటుందని నిపుణులు అభిప్రాయపడుతున్నారు. ఇంకా స్పష్టంగా చెప్పాలంటే ఈ ప్రభావం 5% మేరకు ఇండవచ్చని అంచనా వేస్తున్నారు. అంటే, ఈ రంగంపై ఒక్కసారిగా ఆకాశం విరిగి పడేంత ప్రమాద సూచికలు ఏమి కనిపించటం లేదన్నది నిపుణుల వాదన. నాలుగో పారిశ్రామిక విప్లవం లో భాగంగా ఈ పరిణామాన్ని చూడాలని వారు చెబుతున్నారు. రోబోలు సాధారణ పనులను మాత్రమే చేయగలవాని, మానవ మేధస్సుతో చేయగలిగే పనులను వాటికి వెంటనే అప్పజెప్పే అవకాశం లేదని విశ్లేషకులు అంటున్నారు.

ఎంట్రీ లెవెల్ జాబ్స్ పై అధిక ప్రభావం...

అతి తక్కువ నైపుణ్యంతో కూడిన ఎంట్రీ లెవెల్ జాబ్స్ పై మాత్రం ఆటోమేషన్ ప్రభావం కొంత అధికంగా ఉంటుందని ఐటీ రంగ నిపుణులు అంచనా వేస్తున్నారు. ఎందుకంటే, డేటా ఎంట్రీ వంటి అతి సాధారణ పనులకు, అధిక మంది మానవ వనరులను ఉపయోగించాల్సి ఉండదని, ఆ పనులను రోబోలకు, ఇతర సాఫ్ట్ వేర్ ఆటోమేషన్ ప్రాసెస్ ల ద్వారా పూర్తి చేయవచ్చని చెబుతున్నారు. అందుకే, ఐటీ, బీపీఓ రంగాల్లో రాణించాలనుకునే యువత ఆదిలోనే నైపుణ్యం కలిగిన కోర్సులు చేయడంతో పాటు, ఎప్పటికప్పుడు సరికొత్త టెక్నాలజీ లను నేర్చుకొంటే... వారి ఉపాధికి వచ్చే ఢోకా ఏమీ ఉండదని నిపుణులు భరోసా ఇస్తున్నారు.

మారనున్న పని విధానం...

అయితే, ఆటోమేషన్ ప్రక్రియ వల్ల ఈ రంగంలో పని విధానం మారుతుందని నిపుణులు చెబుతున్నారు. ప్రస్తుతం పనిచేస్తున్న విభాగాల నుంచి నిపుణులను సరికొత్త టెక్నాలజీ విభాలవైపు తరలించటం తప్పనిసరి అని వారు విశ్లేషిస్తున్నారు. ఆ మేరకు ఉద్యోగులు కూడా మానసికంగా, నైపుణ్య పరంగా సిద్ధంగా ఉండాలని సూచిస్తున్నారు. ఇక్కడే, ఐటీ , బీపీఓ రంగాలు సరికొత్త సవాళ్ళను ఎదుర్కోబోతున్నాయని వారు అనుమానిస్తున్నారు. మానవ వనరుల విభాగాలు ఈ దిశగా కొత్త వ్యూహాలకు పదును పెట్టాలని సూచిస్తున్నారు. ఏది ఏమైనా... ఉద్యోగం కాపాడుకోవాలంటే మాత్రం కొత్త టెక్నాలజీ నేర్చుకొంటే మంచిది. మీరు ఏమంటారు?