ప్రాపర్టీ ట్యాక్స్ బకాయిదారులకు తెలంగాణ బంపరాఫర్, 90% వడ్డీ మాఫీతో పథకం

హైదరాబాద్: ఆస్తి పన్ను బకాయిలపై తెలంగాణ ప్రభుత్వం డిఫాల్టర్స్‌కు బంపరాఫర్ ఇచ్చింది. గ్రేటర్ హైదరాబాద్ మున్సిపల్ కార్పోరేషన్ (GHMC), పట్టణాల్లో ఆస్తి పన్ను బకాయిల పైన వన్ టైమ్ స్కీం (OTS) పథకాన్ని ప్రకటించింది. 2019-20 ఆస్తి పన్ను మొత్తాన్ని పది శాతం వడ్డీతో చెల్లిస్తే 90 శాతం వడ్డీ మాఫీ చేయనున్నట్లు ప్రభుత్వం ఉత్తర్వులు జారీ చేసింది.

ఆగస్ట్ 1వ తేదీ నుండి సెప్టెంబర్ 15వ తేదీ వరకు ఈ అవకాశం కల్పిస్తున్నట్లు మంత్రి కేటీ రామారావు నిన్న ప్రకటించారు. గ్రేటర్ పరిధిలో 5.64 లక్షల మంది ప్రాపర్టీ ట్యాక్స్ చెల్లిస్తున్నారు. ఎవరైనా బకాయి పడితే వడ్డీని కేవలం 10 శాతం చెల్లిస్తే సరిపోతుంది. 90 శాతం మాఫీ చేస్తున్నారు.

హైదరాబాద్‌లోనే లక్షలాది మంది రూ.1,477.86 కోట్లు బకాయిలు చెల్లించాల్సి ఉంది. వడ్డీతో కలిపి ఈ మొత్తం బకాయిపడ్డారు. గత పదిహేను నుండి ఇరవై సంవత్సరాలుగా బకాయిలు పేరుకుపోతున్నాయి. ఇలాంటి పరిస్థితుల్లో బకాయిపడిన పన్ను చెల్లింపుదారులను ప్రోత్సహించేందుకు కొంత ఉపశమనం కల్పించినట్లు చెబుతున్నారు.