Hyderabad: షాపింగ్, వెల్‌నెస్, గ్యాస్ట్రోనమీ.. హైదరాబాద్ బ్రాండింగ్ మార్చబోతున్న మూడు కీలక స్తంభాలు!

తెలంగాణ రాజధాని హైదరాబాద్ (Hyderabad) అంటే కేవలం ఐటీ కంపెనీలు, చారిత్రక కట్టడాలు మాత్రమే కాదు.. ఇప్పుడు ఈ నగరం ప్రపంచ స్థాయి పర్యాటక కేంద్రంగా రూపాంతరం చెందుతోంది. పర్యాటక రంగంలో హైదరాబాద్ కీర్తిని అంతర్జాతీయ స్థాయికి తీసుకెళ్లేందుకు తెలంగాణ పర్యాటక అభివృద్ధి సంస్థ (TGTDC) ఒక భారీ బ్రాండింగ్ వ్యూహాన్ని రూపొందించింది. గ్యాస్ట్రోనమీ (ఆహార సంస్కృతి), వెల్నెస్ (ఆరోగ్యం, ఆధ్యాత్మికత), ప్రీమియం షాపింగ్ అనే మూడు ప్రధాన స్తంభాల ఆధారంగా ఒక 'టూరిజం ట్రయాంగిల్'ను అధికారులు ఆవిష్కరించారు.

1. గ్యాస్ట్రోనమీ: ప్రపంచానికి రుచి చూపించే హైదరాబాద్

హైదరాబాద్ పేరు వినగానే మనకు మొదట గుర్తొచ్చేది బిర్యానీ. అయితే కేవలం బిర్యానీకే పరిమితం కాకుండా.. ఇక్కడి విభిన్నమైన ఆహార సంస్కృతిని ప్రపంచవ్యాప్తం చేయాలని అధికారులు నిర్ణయించారు. పాతబస్తీలోని సంప్రదాయ వంటకాల నుంచి నేటి మోడరన్ ఫైన్ డైనింగ్ అనుభవాల వరకు పర్యాటకులకు పరిచయం చేయడమే ఈ వ్యూహం ముఖ్య ఉద్దేశ్యం. గ్లోబల్ క్యాంపెయిన్ల ద్వారా విదేశీ పర్యాటకులు నగరానికి వచ్చి, ఇక్కడి రుచులను ఆస్వాదించేలా ప్రత్యేకంగా క్యూరేటెడ్ ఫుడ్ టూర్లను ప్లాన్ చేస్తున్నారు.

2. వెల్నెస్: మానసిక ప్రశాంతతకు కేరాఫ్ అడ్రస్

రెండవ కీలక స్తంభం 'వెల్నెస్'. నేటి ఒత్తిడితో కూడిన ప్రపంచంలో పర్యాటకులు ఆధ్యాత్మిక , మానసిక ప్రశాంతతను కోరుకుంటున్నారు. హైదరాబాద్ చుట్టుపక్కల ఉన్న మెడిటేషన్ సెంటర్లు, హోలిస్టిక్ హీలింగ్ కేంద్రాలు , ఆధ్యాత్మిక రిట్రీట్లను ఈ బ్రాండింగ్ ద్వారా ప్రమోట్ చేయనున్నారు. ముఖ్యంగా కన్హా శాంతి వనం వంటి గ్లోబల్ మెడిటేషన్ హబ్‌లు ఈ వెల్నెస్ టూరిజంలో ప్రధాన ఆకర్షణగా నిలుస్తాయి. యోగా, ధ్యానం , ఆయుర్వేద చికిత్సల కోసం వచ్చే అంతర్జాతీయ పర్యాటకుల సంఖ్యను పెంచడమే దీని లక్ష్యం.

3. ప్రీమియం షాపింగ్: పాతబస్తీ నుంచి హైటెక్ సిటీ వరకు

మూడవది షాపింగ్. హైదరాబాద్ నగరం తన ముత్యాలు, చేనేత వస్త్రాలు , హస్తకళలకు ప్రపంచ ప్రసిద్ధి చెందింది. లాడ్ బజార్‌లోని గాజులు, గద్వాల , పోచంపల్లి చీరలు, బిద్రీ కళాఖండాలను ప్రదర్శించడంతో పాటు.. హైటెక్ సిటీ , జూబ్లీహిల్స్‌లో ఉన్న ఆధునిక మాల్స్ , లగ్జరీ రిటైల్ బ్రాండ్‌లను పర్యాటకులకు చేరువ చేయనున్నారు. సంప్రదాయం , ఆధునికత కలగలిసిన షాపింగ్ అనుభవాన్ని పర్యాటకులకు అందించాలని ప్రభుత్వం భావిస్తోంది.

టూరిజం అభివృద్ధికి మరిన్ని చర్యలు

TGTDC మేనేజింగ్ డైరెక్టర్ వల్లూరు క్రాంతి గారు తెలిపిన వివరాల ప్రకారం, ఈ మూడు రంగాల్లో హైదరాబాద్కు అద్భుతమైన సామర్థ్యం ఉంది. కేవలం పర్యాటక ప్రాంతాలను చూపించడమే కాకుండా, పర్యాటకులకు ఒక 'అనుభవాన్ని' (Experience) అందించడమే లక్ష్యంగా ప్రభుత్వం పనిచేస్తోంది. విదేశీ ప్రతినిధులు, ఇన్‌ఫ్లుయెన్సర్ల ద్వారా ఈ ప్రచారాన్ని మరింత ఉధృతం చేయనున్నారు. మౌలిక సదుపాయాల మెరుగుదల, చారిత్రక కట్టడాల సుందరీకరణ వంటి పనులు కూడా దీనిలో భాగంగా సాగుతున్నాయి. తద్వారా స్థానికంగా ఉపాధి పెరగడమే కాకుండా రాష్ట్ర ఖజానాకు విదేశీ మార్పిడి ఆదాయం కూడా లభిస్తుంది.