పోటీ సంస్థలకు షాకిచ్చేలా నెట్ ఫ్లిక్స్ ప్లాన్

అమెజాన్ ప్రైమ్ వీడియోకు షాకిచ్చేలా అతి తక్కువ ధరకు నెలవారీ ప్లాన్‌ను ఈ రోజు ప్రకటించింది. మొబైల్ లేదా ట్యాబ్ సేవలకు మాత్రమే ఈ ప్లాన్ పరిమితమవుతుంది. టీవీకి కనెక్ట్ చేసుకోవడం వంటి ఫీచర్స్ లేవు. నెలకు రూ.500 బేసిక్ ప్లాన్‌తో కస్టమర్లను ఆకట్టుకోలేకపోయింది. అమెజాన్, హాట్‌స్టార్‌లు అంతకంటే తక్కువగా సేవలు అందిస్తున్నాయి. దీంతో వాటికి పోటీగా ఇప్పుడు ఈ కొత్త ప్లాన్ తెచ్చింది.

ఆఫర్ ప్రస్తుతానికి ఇక్కడే

నెట్‌ఫ్లిక్స్ గత ఏడాది చివరలో ఇండియా, కొన్ని ఇతర ఆసియా మార్కెట్లలో తక్కువ ధరల సబ్‌స్క్రిప్షన్ ప్లాన్‌ను పరీక్షించడం ప్రారంభించింది. న్యూఢిల్లీలో విలేకరుల సమావేశంలో కంపెనీ అధికారులు ఈ రోజు మాట్లాడుతూ... ఈ ఆఫర్‌ను ప్రస్తుతానికి ఇతర ప్రాంతాలకు (దేశాలకు) విస్తరించే ఆలోచన లేదని చెప్పారు. నెట్‌ఫ్లిక్స్ వీక్లీ సబ్‌స్క్రిప్షన్ ప్లాన్‌ను కూడా పరీక్షిస్తోంది. అది కూడా ఇకపై కొనసాగదని స్పష్టం చేశారు.

సరికొత్త ఆఫర్‌తో ఎక్కువమంది..

ఈ ఏడాది జూన్ నెలలో ముగిసిన క్వార్టర్ 1కు 2.7 మిలియన్ల మంది కొత్త సబ్‌స్క్రైబర్లను చేర్చుకున్నట్లు నెట్‌ఫ్లిక్స్ కొద్ది రోజుల క్రితం ప్రకటించింది. ఈ ఏడాది ప్రారంభంలో అంచనా వేసిన 5.1 మిలియన్ల సంఖ్య కంటే ఇది చాలా తక్కువ. ఇప్పుడు రూ.199 ఆఫర్‌తో ఎక్కువమంది సబ్‌స్క్రైబ్ అవుతారని భావిస్తున్నారు.

వివిధ ఆఫర్లు

తాజా ప్లాన్‌లో ఓసారి ఒక స్మార్ట్‌ఫోన్ లేదా టాబ్లెట్‌లో SD కంటెంట్‌ను వీక్షిచేందుకు ఈ ప్లాన్ వినియోగదారులను అనుమతిస్తుంది. రూ.499, రూ.649, రూ.799 మధ్య ఉన్న ప్రస్తుత, బేసిక్, ప్రీమియం ప్రణాళికలతో పాటు నెట్‌ఫ్లిక్స్ తీసుకు వచ్చిన నాలుగో ప్లాన్ ఇది. ఫిక్కి నివేదిక ప్రకారం భారతీయ వినియోగదారులు ప్రయాణంలోనే చూస్తున్నారనీ, 30% ఫోన్ సమయంలో 70% మొబైల్ డేటాను ఎంటర్‌టైన్‌మెంట్‌లో గడుపుతున్నారని, దీంతో సాధ్యమైనంత ఎక్కువ డివైస్‌లకు చేరుకోవడమే తమ లక్ష్యమని నెట్‌ఫ్లిక్స్ పార్ట్‌నర్ ఎంగేజ్‌మెంట్ డైరెక్టర్ చెప్పారు. దాదాపు పదమూడు కొత్త చిత్రాలు, తొమ్మిది కొత్త ఒరిజినల్ సిరీస్‌లు ఇప్పటికే అందుబాటులో ఉంచినట్టు సంస్థ తెలిపింది.