Gold: నిశ్శబ్దంగా ఉన్న బంగారం మార్కెట్.. బ్యాంకుల వ్యూహం మారింది, ఇన్వెస్టర్లు జాగ్రత్త!

గత కొన్ని ఏళ్లుగా బంగారానికి ఉన్న డిమాండ్ చూస్తుంటే.. పసిడి ధరలకు అడ్డుకైతే లేదనిపించింది. ప్రపంచవ్యాప్తంగా సెంట్రల్ బ్యాంకులు పెద్ద ఎత్తున బంగారాన్ని కొనుగోలు చేయడం దీనికి ఒక ప్రధాన కారణం. అయితే 2026 ప్రారంభంలో ఈ ధోరణిలో ఊహించని మార్పు వచ్చింది. జనవరి నెలలో సెంట్రల్ బ్యాంకుల గోల్డ్ రన్ దాదాపు 80 శాతం తగ్గిపోయిందని వరల్డ్ గోల్డ్ కౌన్సిల్ (WGC) తాజా నివేదిక వెల్లడించింది. మరి ఇది కేవలం విరామమా? లేక పసిడి పతనానికి ఆరంభమా? అనే ఆసక్తికర విషయాలు ఇప్పుడు తెలుసుకుందాం.

బంగారం ధరలు ఆకాశాన్ని తాకడానికి ప్రధాన మద్దతుగా నిలిచిన సెంట్రల్బ్యాంకుల కొనుగోళ్లు ఒక్కసారిగా మందగించాయి. 2025లో నెలకు సగటున 27 టన్నుల బంగారాన్ని కొనుగోలు చేసిన బ్యాంకులు.. 2026 జనవరిలో కేవలం 5 టన్నుల నికర కొనుగోళ్లతో సరిపెట్టుకున్నాయి. ఇది అంతకుముందు సంవత్సరంతో పోలిస్తే 80 శాతానికి పైగా తగ్గుదల. ఈ గణాంకాలు చూస్తుంటే ఇన్వెస్టర్లలో ఒక రకమైన ఆందోళన మొదలైంది. అసలు బంగారం కొనుగోళ్లు ఇంతగా ఎందుకు పడిపోయాయో విశ్లేషించాల్సిన అవసరం ఉంది.

ధరల హెచ్చుతగ్గులే ప్రధాన కారణమా?

వరల్డ్ గోల్డ్ కౌన్సిల్ విశ్లేషణ ప్రకారం, జనవరిలో బంగారం ధరలు రికార్డు స్థాయికి చేరడం, మార్కెట్‌లో నెలకొన్న అస్థిరత వల్ల బ్యాంకులు కొంత విరామం తీసుకున్నాయి. ధరలు విపరీతంగా పెరిగినప్పుడు రిజర్వ్ మేనేజర్లు కొనుగోళ్లను వాయిదా వేసి, మార్కెట్ సాధారణ స్థితికి వచ్చే వరకు వేచి చూడటం సహజం. అదీకాక జనవరి నెలలో కొన్ని బ్యాంకులు తమ ఆర్థిక ప్రణాళికల్లో బిజీగా ఉండటం కూడా ఈ మందగమనానికి ఒక కారణం కావచ్చు. అయితే ఇది కేవలం స్వల్పకాలిక మార్పేనని, దీర్ఘకాలికంగా బంగారానికి ఉన్న క్రేజ్ తగ్గదని నిపుణులు అభిప్రాయపడుతున్నారు.

కొనుగోలు చేసిన దేశాలు ఏవి? అమ్మినవి ఏవి?

జనవరిలో మొత్తం కొనుగోళ్లు తక్కువగా ఉన్నప్పటికీ.. కొన్ని దేశాలు మాత్రం తమ నిల్వలను పెంచుకుంటూనే ఉన్నాయి.

• ఉజ్బెకిస్తాన్: అత్యధికంగా 9 టన్నుల బంగారాన్ని కొనుగోలు చేసి మొదటి స్థానంలో నిలిచింది.
• చైనా: వరుసగా 15వ నెలలో కూడా బంగారాన్ని సేకరించింది. దీనితో ఆ దేశ నిల్వల్లో బంగారం వాటా 10 శాతానికి చేరువయ్యింది.
• మలేషియా, చెక్ రిపబ్లిక్: ఇవి కూడా స్వల్పంగా బంగారాన్ని తమ ఖాతాలో చేర్చుకున్నాయి.
• రష్యా, బల్గేరియా: మరోవైపు, రష్యా సెంట్రల్ బ్యాంక్ 9 టన్నుల బంగారాన్ని విక్రయించగా.. బల్గేరియా కూడా స్వల్పంగా అమ్మకాలు జరిపింది. యూరో కరెన్సీని స్వీకరించే క్రమంలో బల్గేరియా ఈ నిర్ణయం తీసుకున్నట్లు తెలుస్తోంది.

భవిష్యత్తులో బంగారం (Gold) పరిస్థితి ఏంటి?

కేవలం ఒక నెల డేటాను చూసి బ్యాంకులు బంగారాన్ని వదిలేస్తున్నాయని అనుకోవడం పొరపాటే అవుతుంది. డాలర్‌పై ఆధారపడటం తగ్గించుకోవడానికి (De-dollarization) , భౌగోళిక రాజకీయ ఉద్రిక్తతల నుంచి తమ ఆర్థిక వ్యవస్థను కాపాడుకోవడానికి చాలా దేశాలు బంగారాన్ని ఒక సురక్షితమైన ఆస్తిగా భావిస్తున్నాయి. ముఖ్యంగా ఇరాన్-ఇజ్రాయెల్ యుద్ధం వంటి పరిస్థితుల నేపథ్యంలో సెంట్రల్ బ్యాంకులు మళ్ళీ కొనుగోళ్లు ప్రారంభించే అవకాశం ఉంది.

ప్రస్తుతానికి జనవరి గణాంకాలు ఒక విరామం లాంటివే తప్ప, ట్రెండ్ రివర్స్ అయినట్లు కాదు. బంగారం ధరలు కొంత స్థిరపడిన తర్వాత బ్యాంకులు మళ్లీ తమ నిల్వలను పెంచుకునే అవకాశం ఉంది. ఇన్వెస్టర్లు కూడా ప్రస్తుత ధరల ఒడిదుడుకులను గమనిస్తూ, దీర్ఘకాలిక లక్ష్యాలతో ముందుకు వెళ్లడం శ్రేయస్కరం. గ్లోబల్ మార్కెట్‌లో అస్థిరత ఉన్నంత కాలం బంగారానికి ఉన్న డిమాండ్ ఎప్పటికీ తగ్గదు.