వర్క్ ఫ్రమ్ హోం చేసింది చాలు ... ఆఫీసులకు రండి ... ఎక్కడంటే !!

ఇళ్ళ నుండి ఎక్కువ కాలం వర్క్ చెయ్యటం మంచిది కాదన్న మంత్రి

కరోనా వ్యాప్తి నేపధ్యంలో సౌదీ అరేబియా లోనూ కొన్ని నెలలుగా ఉద్యోగులు ఇళ్ల నుండి పని చేస్తున్నారు. కరోనా వ్యాప్తి పూర్తిస్థాయిలో తగ్గనప్పటికీ ,కేసులు నమోదు అవుతున్నప్పటికీ సౌదీ అరేబియా కీలక నిర్ణయం తీసుకుంది. ఆగస్టు 30 నుంచి వర్క్ ఫ్రమ్ హోమ్ కు గుడ్ బై చెప్పి , అందరూ ఆఫీసులకు బయలుదేరండి అంటూ సూచించింది. ఇళ్ల నుండి ఎక్కువ కాలం పాటు వర్క్ చేయడం మంచిది కాదని మానవ వనరుల శాఖ మంత్రి ఆల్ రజీ స్పష్టం చేశారు .

ఆఫీసులలోనూ కరోనా నియంత్రణా చర్యలు

ఇప్పటికే అన్ని విభాగాలకు ఈ సర్క్యులర్స్ ను జారీ చేసి అందరూ ఆఫీసులకు వచ్చి పని చేయాలని, తాము చేసిన సూచనలు అమలయ్యేలా చూడాలని విభాగాధిపతులను ఆదేశించారు. అంతేకాదు కరోనా నియంత్రణ చర్యల్లో భాగంగా, ఆఫీసులలోనూ కరోనా నిబంధనలు పాటించాలని సూచించారు. ఆఫీసులలో కరోనా వ్యాప్తి జరగకుండా ఉండడం కోసం వేలిముద్రలతో లాగిన్ అయ్యే విధానాన్ని నిలిపివేశారు. ఒక్కసారిగా అందరూ ఉద్యోగులు ఆఫీస్ కు రావలసిన అవసరం లేదని , ఎవరి అవసరం అయితే ఎక్కువగా ఉంటుందో వారి లిస్టులను తయారు చేసి తదనుగుణంగా వారిని మాత్రమే పిలిపించి పని చేయించుకోవాలని ఆయన పేర్కొన్నారు.

25 శాతాన్ని మించి ఏ సంస్థలోని ఉద్యోగులు ఇంటి నుండి పని చేసే అవసరం లేదు

25 శాతాన్ని మించి ఏ సంస్థలోని ఉద్యోగులు ఇంటి నుండి పని చేసే అవసరం లేదంటూ సర్క్యులర్ ద్వారా తెలిపారు. ప్రభుత్వం సూచించిన నియమాలను పాటిస్తూ, ఆఫీసులో పని చేసుకోవాలని సౌదీ అరేబియా మానవ వనరుల శాఖా మంత్రి పేర్కొన్నారు. ఒకపక్క ప్రపంచంలోని దాదాపు అన్ని దేశాలు వర్క్ ఫ్రమ్ హోం విధానాన్ని ప్రోత్సహిస్తుంటే సౌదీ అరేబియా మాత్రం ఆఫీసులకు వచ్చి పని చెయ్యాల్సిందే అంటుంది. ఇక ఇండియాలోనూ ఈ ఏడాది చివరి వరకు వర్క్ ఫ్రమ్ హోం విధానమే అమలయ్యే పరిస్థితి కనిపిస్తుంది.