జియో, ఎయిర్‌టెల్ వెనక్కి.. ఫాస్టెస్ట్ మొబైల్ నెట్ వర్క్ వొడాఫోన్ ఐడియా

4G నెట్ వర్క్ స్పీడ్‌లో VI(వోడాఫోన్ ఐడియా)... రిలయన్స్ జియో, ఎయిర్‌టెల్‌ను అధిగమించింది. తద్వారా సెప్టెంబర్ త్రైమాసికానికి వేగవంతమైన మొబైల్ ఆపరేటర్‌గా నిలిచింది. నెట్ వర్క్ అనలిస్ట్ ఊక్లా ప్రకారం 4జీ నెట్ వర్క్‌లో మూడో క్వార్టర్‌లో వొడాఫోన్ ఫాస్టెస్ట్ మొబైల్ ఆపరేటర్‌గా నిలిచింది. స్పీడ్‌కు సంబంధించి వివిధ నగరాల మధ్య తేడా ఉంది. హైదరాబాద్‌లో ఫాస్టెస్ట్ డౌన్ లోడ్ స్పీడ్ నమోదయింది.

దేశంలో సగటు డౌన్ లోడ్ స్పీడ్ ఏటా 11.6 శాతం పెరుగుతోందని ఊక్లా తెలిపింది. ఈ నివేదిక ప్రకారం సెప్టెంబర్ త్రైమాసికంలో VI సగటు డౌన్ లోడ్ స్పీడ్ 13.74Mbps, అప్ లోడ్ స్పీడ్ 6.19Mbpsగా ఉంది. ఎయిర్‌టెల్ సగటు డౌన్ లోడ్ స్పీడ్ 13.58Mbps, అప్ లోడ్ స్పీడ్ 4.15Mbps, జియో డౌన్ లోడ్ స్పీడ్ 9.71Mbps, అప్ లోడ్ స్పీడ్ 3.41Mbpsగా ఉంది. డౌన్ లోడ్, అప్ లోడ్ స్పీడ్‌లో జియో మూడో స్థానంలో ఉంది.

అయితే 4జీ నెట్ వర్క్ అందుబాటులో జియో 99.7 శాతంతో అగ్రస్థానంలో ఉంది. ఎయిర్‌టెల్ 98.7 శాతంతో రెండో స్థానంలో, వొడాఫోన్ ఐడియా 91.1 శాతంతో మూడో స్థానంలో ఉంది. మొబైల్ నెట్ వర్క్స్ ద్వారా సగటు డౌన్ లోడ్ వేగంలో హైదరాబాద్ 14.35 శాతంగా ముందు ఉంది. ఆ తర్వాత ముంబై 13.55Mpbs, విశాఖట్నం 13.40Mpbsగా ఉంది. భారత ప్రముఖ నగరాల్లో డౌన్ లోడ్ స్పీడ్‌లో ఢిల్లీ 13.04Mpbsతో ఆరో స్థానంలో ఉంది.