శుభవార్త, SBI హోమ్‌లోన్ తీసుకునేవారికి అదిరిపోయే న్యూస్: వడ్డీరేట్లపై కీలక ప్రకటన

ప్రభుత్వరంగ స్టేట్ బ్యాంక్ ఆఫ్ ఇండియా(SBI) హోమ్ లోన్ తీసుకునే వారికి గుడ్‌న్యూస్. వడ్డీ రేట్ల మార్పు కాలపరిమితిని తగ్గించింది. మార్జినల్ కాస్ట్ ఆఫ్ లెండింగ్ రేట్ (MCLR) లింక్డ్ వడ్డీ రేట్ల కాలపరిమితిని ఏడాది నుండి ఆరు నెలలకు తగ్గించింది. కాలపరిమితిని తగ్గించడం వల్ల హోమ్‌లోన్ రుణగ్రహీతలకు ఎంసీఎల్ఆర్ వడ్డీ రేట్ల తగ్గింపు ప్రయోజనాలు మరింత వేగంగా అందుతాయి. ఈ మేరకు స్టేట్ బ్యాంక్ ఆఫ్ ఇండియా ట్విట్టర్ వేదిక ద్వారా ఈ విషయాన్ని వెల్లడించింది.

అందుకే ఎంసీఎల్ఆర్ కాలపరిమితి తగ్గింపు

ఎంసీఎల్ఆర్ మార్పు కాలపరిమితిని ఏడాది నుండి ఆరు నెలలకు తగ్గించడంతో వడ్డీరేట్ల తగ్గింపు ప్రయోజనం కోసం రుణగ్రహీతలు ఏడాది వరకు వేచి చూడాల్సిన అవసరం లేదని ఎస్బీఐ తెలిపింది. రేపో రేటు ఇతర మార్కెట్ ఆధారిత ప్రామాణికాలపై రుణాలను తీసుకోకుండా ఎంసీఎల్ఆర్ ఆధారిత రుణాలు తీసుకున్నవారికి రిజర్వ్ బ్యాంక్ ఆఫ్ ఇండియా(RBI) వడ్డీరేట్ల తగ్గింపు ప్రయోజనాలు వేగంగా అందడం లేదనే వాదనలు ఉన్నాయి. ఈ నేపథ్యంలో ఎస్బీఐ నిర్ణయం తీసుకోవడం గమనార్హం.

ఎంసీఎల్ఆర్ రేటు

ఎస్బీఐ తీసుకున్న ఈ నిర్ణయంతో రుణాల మంజూరుకు మరింత ఊతమిస్తుందని భావిస్తున్నాయి. ప్రస్తుతం ఎస్బీఐ ఏడాది ఎంసీఎల్ఆర్ 7% ఉంది. 6 నెలల ఎంసీఎల్ఆర్ 6.95% ఉంది. ఈ ఏడాది ఈ రెండు రేట్లను 90 బేసిస్ పాయింట్ల మేరకు తగ్గించింది. అయితే కొత్తగా రుణాలు తీసుకున్నవారికే ఈ 6 నెలల ఎంసీఎల్ఆర్ సవరణలు వర్తిస్తాయని తెలుస్తోంది.

ఎంసీఎల్ఆర్ లింక్డ్ వడ్డీ రేటు ఎలా?

బ్యాంకులు రెపో రేటు, ఎంసీఎల్ఆర్ సహా ఇతర ఆధారిత ప్రమాణికాలపై రుణాలు ఇస్తుంది. ఎంసీఎల్ఆర్ ఆధారిత రుణాలు తీసుకునే వారికి ప్రస్తుత మార్పు వర్తిస్తుంది. బ్యాంకులు వడ్డీ రేట్లను ఇప్పటి వరకు ఏడాదికి ఓసారి సమీక్షిస్తుంది. అప్పుడే రుణగ్రహీత ఈఎంఐలో మార్పు ఉంటుంది. ఉదాహరణకు లోన్ రీసెట్ డేట్ జనవరి అయితే, బ్యాంకులు ఎంసీఎల్ఆర్‌ను జూలైలో సవరించినట్లయితే, మీ ఈఎంఐపై ఆ ప్రభావం వచ్చే ఏడాది జనవరికి వర్తిస్తుంది. ఇప్పుడు ఆరు నెలలకే మార్పు చేయడం వల్ల రుణగ్రహీతలకు వేగంగా వడ్డీ రేటు తగ్గింపు ప్రయోజనం అందుతుంది. ఎస్బీఐకి దేశవ్యాప్తంగా 22వేల బ్రాంచీలు, 58,000 ఏటీఎంలు, సీడీఎం నెట్ వర్క్ ఉంది.