టీసీఎస్, యాక్సెంచర్ పోటీపడ్డప్పటికీ.. ఇన్ఫోసిస్ చరిత్రలో అతిపెద్ద, అరుదైన డీల్

దేశీయ సాఫ్టువేర్ దిగ్గజం ఇన్ఫోసిస్.. అమెరికా ఫండింగ్ ఏజెన్సీ వాన్‌గార్డ్ నుండి భారీ కాంట్రాక్ట్ దక్కించుకున్నట్లుగా తెలుస్తోంది. కరోనా మహమ్మారి సమయంలో భారీ డీల్ కుదరడం గమనార్హం. ఈ డీల్ వ్యాల్యూ 1.5 బిలియన్ డాలర్లు లేదా రూ.11,500 కోట్లు. పదేళ్లకాలం వరకు సర్వీసులు పొడిగించే వీలున్నట్లు సంబంధిత వర్గాలు చెబుతున్నాయి. అప్పుడు ఈ డీల్ 2 బిలియన్ డాలర్ల వ్యాల్యూకు చేరుతుందని అంచనా.

ఇన్ఫీ చరిత్రలో అతిపెద్ద డీల్

ఇన్ఫోసిస్ ఇటీవల 2020-21 ఆర్థిక సంవత్సరం తొలి క్వార్టర్ ఫలితాలు విడుదల చేసింది. ఈ క్వార్టర్‌లో 1.7 బిలియన్ డాలర్ల డీల్స్ కుదిరినట్లు తెలిపింది. అయితే ఈ డీల్స్‌లో వాన్‌గార్డ్ లేదని విశ్లేషకుల అభిప్రాయం. అంటే ఆ లెక్కన ఇది అదనపు డీల్. ఇన్ఫోసిస్ చేసుకున్న ఒప్పందాల్లో ఇప్పటి వరకు ఇది అతి పెద్దదిగా చెబుతున్నారు. అంతకుముందు ఈ డీల్ వ్యాల్యూ బిలియన్ డాలర్ల లోపుగా అంచనా వేశారు. గత వారం షేర్ దూకుడుకు ఈ డీల్ పైన అంచనాలు కొంత కారణమైనట్లుగా చెబుతున్నారు. కంపెనీ దీనిపై స్పందించాల్సి ఉంది.

టీసీఎస్, యాక్సెంచర్, విప్రోలు పోటీ పడ్డప్పటికీ..

తొలి క్వార్టర్ ఫలితాల తర్వాత, డీల్స్ తెలిశాక ఇన్ఫీ షేర్లు గతవారం భారీగా పుంజుకున్నాయి. ఇప్పుడు ఈ భారీ డీల్ వెలుగు చూడటం గమనార్హం. వాన్‌గార్డ్ డీల్ కోసం ఇన్ఫోసిస్‌తో పాటు మిగతా ఐటీ దిగ్గజాలు టీసీఎస్, యాక్సెంచర్, విప్రోలు పోటీ పడ్డాయని తెలుస్తోంది. ఈ డీల్‌లో భాగంగా బీపీఎం సర్వీసుతో పాటు డిజిటల్ ట్రాన్స్‌పార్మేషన్ సేవల్ని ఇన్ఫోసిస్ అందించనున్నట్లు చెబుతున్నారు. వాన్‌గార్డ్ క్లౌడ్ ప్లాట్‌ఫాం ద్వారా నిర్వహించే రికార్డ్ కీపింగ్ సర్వీసులకు మద్దతివ్వనున్నట్లు చెబుతున్నారు.

1 బిలియన్ డాలర్ల డీల్ అరుదు..

ఇండియన్ ఐటీ కంపెనీలకు 1 బిలియన్ డాలర్ల డీల్స్ అరుదు అని చెబుతున్నారు. ఇన్ఫోసిస్‌కు గతంలో వెరిజోన్ డీల్ గత ఏడాది నాటికి 1 బిలియన్ డాలర్లకు చేరుకుందని చెబుతున్నారు. ఈ వాన్‌గార్డ్ డీల్‌కు సంబంధించి సేవల కోసం ఇన్ఫోసిస్ బెంగళూరులోని ఎలక్ట్రానిక్ సిటీలో 3,000 సీట్ల సామర్థ్యంతో సౌకర్యాలు ఏర్పాటు చేసినట్లు చెబుతున్నారు. ప్రారంభంలో 300 నుండి 400 మంది ఉద్యోగులు ఉంటారు. ఆ తర్వాత క్రమంగా డీల్‌కు అనుగుణంగా పెంచుతారు.

షేర్ జూమ్

వివిధ ఫండ్స్ ద్వారా ఇన్ఫోసిస్‌లో 3% వాటాను వాన్‌గార్డ్ కలిగి ఉంది. రిటైర్మెంట్ సర్వీసుల విభాగంలో ఇన్ఫోసిస్‌కు మంచి పట్టు ఉంది. అమెరికాలో ఇలాంటి టాప్ 20 కంపెనీలలో సగం వరకు సేవల్ని అందిస్తోంది. ప్రాథమిక ఒప్పంద ప్రాస్పెక్టింగ్స్ 12 నెలల కాలంలో ప్రారంభమవుతాయి. ఇన్ఫోసిస్ షేర్ ధర ఈ రోజు మరింతగా పుంజుకుంది. 1.20 శాతం ఎగిసి రూ.914కు చేరుకుంది. ఓ దశలో రెండు శాతం ఎగిసి రూ.924 ట్రేడ్ అయింది. గత గురువారం రూ.955ను అధిగమించడం ద్వారా ఇన్ఫీ షేర్ 52 వారాల గరిష్టానికి చేరుకుంది.