హీరో మోటోకార్ప్ అరుదైన ఘనత, షారూక్ ఖాన్ చేత 10కోట్లవ యూనిట్
దేశీయ ద్విచక్ర వాహన దిగ్గజం హీరో మోటోకార్ప్ ఉత్పత్తిలో 10 కోట్ల యూనిట్లను దాటి అరుదైన ఘనత సాధించింది. హరిద్వార్లోని తమ మ్యానుఫ్యాక్చరింగ్ ప్లాంట్ నుండి గురువారం 10 కోట్లవ యూనిట్గా ఎక్స్ట్రీమ్ 160ఆర్ బైక్ను తీసుకు వస్తున్నట్లు తెలిపింది. ముందు ముందు కూడా ఇదే వృద్ధిని కొనసాగించేందుకు వచ్చే అయిదేళ్ల కాలంలో ఏటా పది కంటే ఎక్కువ ఉత్పత్తులను మార్కెట్లో ప్రవేశపెట్టనున్నట్లు తెలిపింది.
1984 జనవరి 19వ తేదీన ఏర్పాటైన ఈ కంపెనీ ఆ తర్వాత పదేళ్లకు 10 లక్షల యూనిట్లను ఉత్పత్తి చేసి మొదటి మైలురాయిని క్రాస్ చేసింది. ఆ తర్వాత 2013లో 5 కోట్ల యూనిట్ల మైలురాయిని, 2017లో 7.5 కోట్ల మైలురాయిని అధిగమించింది. తాజాగా 10 కోట్ల యూనిట్లు అందుకున్నట్లు హీరో మోటోకార్ప్ చైర్మన్, సీఈవో పవన్ ముంజాల్ తెలిపారు.
కేవలం 7 ఏళ్లలోనే 5 కోట్ల నుండి 10 కోట్ల యూనిట్లకు చేరుకుంది. హీరోమోటో కార్ప్ వరుసగా 20వ సంవత్సరం ప్రపంచ అతిపెద్ద టూవీలర్ మ్యానుఫ్యాక్చరర్గా నిలిచింది. కాగా, ఎక్స్ట్రీమ్ 160ఆర్ బైక్ను బాలీవుడ్ నటుడు షారూక్ ఖాన్ ప్రారంభించారు.