4 దశాబ్దాల్లో జపాన్ వృద్ధి అత్యంత చెత్త రికార్డ్! కానీ ఆ దేశాల కంటే బెట్టర్

కరోనా మహమ్మారి కారణంగా అమెరికా, సింగపూర్, సౌదీ అరేబియా, మలేసియా సహా ప్రపంచ దేశాల ఆర్థిక వ్యవస్థలు కుప్పకూలాయి. టెక్నాలజీలో ఎంతో ముందుండే జపాన్‌పై కూడా ఈ వైరస్ ప్రభావం తీవ్రంగానే పడింది. ఈ మహమ్మారి కారణంగా జపాన్ వృద్ధి రేటు వరస్ట్ స్థాయికి పడిపోయింది. ప్రపంచంలో మూడో అతిపెద్ద ఎకానమీ జపాన్. రెండో క్వార్టర్‌లో దీని వృద్ధి రేటు 7.8 శాతం ప్రతికూలత నమోదు చేసింది. ఈ మేరకు జపాన్ కేబినెట్ ఆఫీస్ సోమవారం తెలిపింది.

1980 నుండి దారుణ పతనం

ఆధునిక రికార్డ్స్ ప్రకారం జపాన్‌కు 1980నుండి ఇది అతిపెద్ద, అలాగే వరుసగా మూడో క్వార్టర్ సంకోచం. ఏప్రిల్-జూన్ త్రైమాసికంలో జపాన్ వృద్ధి దారుణంగా మందగించినప్పటికీ, ఇతర ప్రధాన ఆర్థిక వ్యవస్థల కంటే మెరుగైన ప్రదర్శన కనబరచడం గమనార్హం. అమెరికా, జర్మనీ దేశాల వృద్ధి అంతకుముందు త్రైమాసికాలతో పోలిస్తే 10శాతం పడిపోగా, బ్రిటిష్ వృద్ధి 20.4శాతం క్షీణించింది. జపాన్ మాత్రం దాదాపు 8 శాతం ప్రతికూలత నమోదు చేసింది.

వినియోగవ్యయం తగ్గడం, ఎగుమతులు పడిపోవడం

G7 దేశాల్లో మిగతా దేశాల విషయానికి వస్తే కెనడా జీడీపీ అంతకుముందు వృద్ధితో పోలిస్తే 12 శాతం పడిపోయింది. కరోనా పుట్టిన చైనా ఆర్థిక వ్యవస్థ రెండో క్వార్టర్‌లో పుంజుకుంది. దాదాపు అన్ని దేశాల మాదిరిగా, జపాన్ జీడీపీ కూడా కరోనా కారణంగా వినియోగవ్యయం తగ్గిపోవడం వల్ల పడిపోయింది. లాక్ డౌన్ ఆంక్షలు, ఎగుమతులు పడిపోవడంతో దెబ్బపడింది.

నేషనల్ ఎమర్జెన్సీ..

ఏప్రిల్, మే నెలల్లో ఆరువారాల పాటు నేషనల్ ఎమర్జెన్సీ కారణంగా ఆ కాలంలో 8.2 శాతం మేర పడిపోయింది. అలాగే, ఇతర దేశాల నుండి ఎగుమతులు భారీగా పడిపోయాయి. ఇతర పెద్ద ఆర్థిక వ్యవస్థలలో కనిపించినంత నష్టం జపాన్‌కు జరగలేదు. కానీ వరుసగా మూడో క్వార్టర్‌లో క్షీణత నమోదు చేసింది. అలాగే ఆ దేశానికి గత నాలుగు దశాబ్దాల్లో ఇది అతిపెద్ద క్షీణత. జూన్, జూలైలలో కార్యకలాపాలు తెరుచుకుంటున్నప్పటికీ రికవరీకి సమయం పట్టనుంది.

ఆర్థిక ప్యాకేజీ

భారత్, అమెరికా సహా వివిధ దేశాలు కరోనా ప్యాకేజీలు ప్రకటించాయి. జపాన్ కూడా ప్రకటించిన రెండు రిలీఫ్ ప్యాకేజీ ఈ ఏడాది సెప్టెంబర్‌తో ముగుస్తాయి. అదే జరిగితే జపాన్‌లోని చిన్న, మధ్య తరహా ఆర్థిక సంస్థలకు ఇబ్బందికర పరిస్థితులు తలెత్తుతాయని ఆర్థికవేత్తలు ఆందోళన వ్యక్తం చేస్తున్నారు. జపాన్ కరోనా కేసుల్లో 46వ స్థానంలో ఉంది. మొత్తం కేసులు 55 వేల వరకు ఉండగా, మృతుల సంఖ్య వెయ్యికి పైగా ఉన్నాయి.