36,000 డాలర్ల దిగువకు పడిపోయిన బిట్ కాయిన్

క్రిప్టో కరెన్సీ మార్కెట్ శుక్రవారం క్షీణించింది. క్రిప్టో దిగ్గజం బిట్ కాయిన్ సహా దాదాపు అన్నీ పతనమయ్యాయి. నేటి ప్రారంభంలో డిజిటల్ టోకెన్స్ లాభపడినప్పటికీ, ఆ తర్వాత మాత్రం పడిపోయాయి. బిట్ కాయిన్ గత నవంబర్ నెలలో ఆల్ టైమ్ గరిష్టం 70,000కు చేరుకుంది. అయితే ఇప్పుడు అందులో దాదాపు సగం వద్ద ఉంది. ఈ వార్త రాసే సమయానికి బిట్ కాయిన్ 0.55 శాతం క్షీణించి 36,415 డాలర్ల వద్ద ట్రేడ్ అయింది.

మిగతా డిజిటల్ టోకెన్స్ విషయానికి వస్తే ఎథేరియం 2.33 శాతం క్షీణించి 2,389 డాలర్లు, ఎక్స్‌పీఆర్ 2.32 శాతం పడిపోయి 0.594626 డాలర్లు, సోలానా 2.83 శాతం తగ్గి 88.35 డాలర్లు, టెర్రా 19.14 శాతం క్షీణించి 49.10 డాలర్లు, కార్డానో 2.85 శాతం తగ్గి 1.02 డాలర్లు, స్టెల్లార్ 2.34 శాతం క్షీణించి 0.191419 డాలర్లు, పోల్కాడాట్ 1.62 శాతం క్షీణించి 17.64 డాలర్లు, డోజీకాయిన్ 2.82 డాలర్లు క్షీణించి 0.138677 డాలర్లు వద్ద ట్రేడ్ అయింది. షిబా ఇను 1.20 శాతం పతనమై 0.000020 వద్ద ట్రేడ్ అయింది.

అమెరికా ఫెడ్ రిజర్వ్ చైర్మన్ జెరోమ్ పోవెల్ వడ్డీ రేట్ల పెంపు ప్రభావం పసిడి పైన, క్రిప్టో కరెన్సీ పైన పడింది. ఈ క్యాలెండర్ ఏడాదిలో నాలుగుసార్లు వడ్డీ రేట్లు పెంచుతామని ఫెడ్ రిజర్వ్ ప్రకటించింది. వడ్డీ రేట్లు పెంచితే స్టాక్, పసిడి, క్రిప్టో కరెన్సీ క్షీణిస్తుంది. ఎందుకంటే సురక్షిత పెట్టుబడుల కోసం సీనియర్ సిటిజన్స్, ఇతరులు తమ పెట్టుబడులను బ్యాంకులకు మళ్లిస్తారు.