వడ్డీ రేటును ఆరోసారి తగ్గించిన ఎస్పీఐ

ఎంసీఎల్ఆర్‌ను మరో 10 బేసిస్ పాయింట్లు తగ్గించిన నేపథ్యంలో హోమ్ లోన్స్‌పై వడ్డీ రేటు తగ్గుతుంది. ఈ ఆర్థిక సంవత్సరంలో ఎంసీఎల్ఆర్ తగ్గించడం ఇది ఆరోసారి. పండుగ సీజన్ నేపథ్యంలో అన్ని వర్గాల ప్రజలకు లబ్ధి చేకూర్చాలనే ఉద్దేశ్యంతో ఈ నిర్ణయం తీసుకున్నట్లు బ్యాంకు తెలిపింది. ఈ నిర్ణయంతో ఎంసీఎల్‌ఆర్‌కు అనుసంధానమైన వడ్డీ రేట్లు 10 బేసిస్ పాయింట్లు తగ్గుతాయి. ఎస్బీఐ కొత్తవారికి రెపో రేటు అనుసంధానిత గృహ రుణాలను అందిస్తోంది. దీంతో ఆర్బీఐ బెంచ్ మార్క్ రేటును సవరించిన ప్రతిసారి రుణ వడ్డీ రేటు కూడా మారుతోంది.

సవరించిన వడ్డీ రేట్లు 10 శాతం నుంచి అమల్లోకి...

సవరించిన వడ్డీ రేట్లు అక్టోబర్ 10వ తేదీ నుంచి అమలులోకి వస్తాయి. కాగా, తాజా ఎంసీఎల్ఆర్ తగ్గింపు ప్రకారం వివిధ కాలపరిమితులపై వడ్డీ రేటు ఇలా...

- ఓవర్ నైట్ ప్రస్తుతం 7.8 శాతం ఉండగా, 7.7 శాతానికి తగ్గింది.

- వన్ మంత్ ప్రస్తుతం 7.8 శాతం ఉండగా, 7.7 శాతానికి తగ్గింది.

- త్రీ మంత్ ప్రస్తుతం 7.85 శాతం ఉండగా, 7.75 శాతానికి తగ్గింది.

- సిక్స్ మంత్ ప్రస్తుతం 8 శాతం ఉండగా, 7.9 శాతానికి తగ్గింది.

- వన్ ఇయర్ ప్రస్తుతం 8.15 శాతం ఉండగా, 8.05 శాతానికి తగ్గింది.

- టూ ఇయర్ ప్రస్తుతం 8.25 శాతం ఉండగా, 8.15 శాతానికి తగ్గింది.

- త్రీ ఇయర్ ప్రస్తుతం 8.35 శాతం ఉండగా, 8.25 శాతానికి తగ్గింది.

FDపై వడ్డీ రేట్ల సవరణ...

పొదుపు ఖాతాలు, ఫిక్స్డ్ డిపాజిట్లపై కూడా ఎస్బీఐ వడ్డీ రేట్లను సవరించింది. రూ.1 లక్షకు పైగా పొదుపు ఖాతాలపై 3.5 శాతం నుంచి 3.25 శాతానికి తగ్గిస్తూ నిర్ణయం తీసుకుంది. తాజా రేట్లు నవంబర్ 1 నుంచి అమలులోకి వస్తాయి. అలాగే, వివిధ కాలపరిమితులకు చెందిన ఫిక్స్డ్ డిపాజిట్లపై వడ్డీ రేట్లను 10 నుంచి 30 బేసిస్ పాయింట్లు తగ్గించింది. బల్క్ డిపాజిట్లపై కూడా ఈ తగ్గింపు వర్తిస్తుంది. సీనియర్ సిటిజన్లకు 50 బేసిస్ పాయింట్ల అదనపు వడ్డీ రేటును అలాగే కొనసాగిస్తోంది. ఇక 7 నుంచి 45 రోజుల కాలపరిమితి డిపాజిట్లపై 4.5 శాతానికి, 46 నుంచి 179 రోజుల కాలపరిమితి డిపాజిట్లపై 5.50 శాతానికి, 180 నుంచి సంవత్సర కాలపరిమితి డిపాజిట్లపై 5.80 శాతానికి వడ్డీ రేట్లు తగ్గిస్తూ నిర్ణయం తీసుకుంది.