7 నగరాల్లో 9 శాతం పెరుగుదల

* కొలీర్స్ వెల్లడించిన వివరాల ప్రకారం దేశంలోని ఏడు ప్రధాన నగరాల్లో ఈ ఏడాది జులై నుంచి సెప్టెంబర్ వరకు స్థూలంగా లీజుకు ఇచ్చిన ఆఫీస్ స్పేస్ 9 శాతం పెరిగి 1.39 కోట్ల చదరపు అడుగులకు చేరుకుంది. ఈ ఏడు నగరాల్లో హైదరాబాద్, ఢిల్లీ - ఎన్ సిఆర్, ముంబై, కోల్కతా, చెన్నై, బెంగళూరు, పూణే ఉన్నాయి.

* జనవరి-సెప్టెంబర్ కాలంలో స్థూలంగా లీజుకు ఇచ్చిన ఆఫీస్ స్పేస్ 4.01 కోట్ల చదరపు అడుగులు.గత ఏడాది ఇదే కాలంతో పోల్చితే వృద్ధి 9 శాతంగా ఉంది.

* కార్పొరేట్లు, కో వర్కింగ్ ఆపరేటర్ల నుంచి ఆఫీస్ స్పేస్ కు ఎక్కువ డిమాండ్ ఏర్పడుతోంది.

మరింత పెరిగే ఛాన్స్...

* దేశ ఆర్థిక వ్యవస్థ వృద్ధిలో మందగమనం నెలకొంది. అయినప్పటికీ కంపెనీలు తమ విస్తరణ కార్యకలాపాలు చేపడుతూనే ఉన్నాయి. మెరుగైన బిజినెస్ సపోర్ట్ ఎకో సిస్టమ్ ఉండటం వల్లనే ఇది సాధ్యమవుతోంది. అందుకే ఈ ఏడాది మూడో త్రైమాసికంలో అద్దెకు తీసుకున్న ఆఫీస్ ప్రదేశం గత ఏడాది ఇదే కాలంతో పోల్చితే 9 శాతం పెరిగి 1.39 కోట్ల చదరపు అడుగులకు చేరుకుంది.

* ఈ ఏడాదిలో కంపెనీలు అద్దెకు తీసుకునే ఆఫీస్ స్పేస్ గత ఏడాదితో పోల్చితే 7-9 శాతం పెరిగే అవకాశం ఉందని కొలీర్స్ అంచనా వేస్తోంది.

ఐటీ, బీపీఎం వాటాయే అధికం

* ఆఫీస్ లను అద్దెకు తీసుకుంటున్న కంపెనీల్లో ఐటీ - బీపీఎం (బిజినెస్ ప్రాసెస్ మేనేజిమెంట్), టెక్నాలజీ కంపెనీల వాటాయే 36 శాతంగా ఉంది.

* జనవరి నుంచి సెప్టెంబర్ వరకు చూస్తే ఫ్లెక్సిబుల్ వర్క్ స్పేస్ వాటా 18 శాతం ఉంది.

రెండో స్థానంలో హైదరాబాద్

* జనవరి-సెప్టెంబర్ మధ్య కాలంలో ఆఫీస్ స్పేస్ అద్దెకు ఇవ్వడంలో బెంగళూరు అగ్రస్థానంలో ఉంది. మొత్తంగా అద్దెకు ఇచ్చిన ఆఫీస్ స్పేస్ లో బెంగళూరు వాటా 30 శాతంగా ఉంది. ఈ నగరంలో అద్దెకు ఇచ్చిన ఆఫీస్ ప్రదేశం 1.21 కోట్ల చదరపు అడుగులుగా ఉంది. గత ఏడాది జనవరి- సెప్టెంబర్ తో పోల్చితే 7 శాతం వృద్ధి నమోదయింది.

* ఢిల్లీ - ఎన్ సి ఆర్ ను అధిగమించి హైదరాబాద్ రెండో స్థానానికి చేరుకుంది. ఈ నగరంలో స్థూలంగా అద్దెకు ఇచ్చిన ఆఫీస్ స్పేస్ వాటా 19 శాతంగా ఉంది. జనవరి-సెప్టెంబర్ లో స్థూలంగా అద్దెకు తీసుకున్న ప్రదేశం 84 శాతం పెరిగి 75 లక్షల చదరపు అడుగులకు చేరుకుంది.