ఫ్లిప్‌కార్ట్, అమెజాన్ భారీ ఆఫర్లు

అక్టోబర్, నవంబర్ నెలల్లో వచ్చే అతిపెద్ద పండుగలు దసరా, దీపావళి. ఈ సమయంలో వ్యాపారం భారీగా జరుగుతుంది. కానీ అమెజాన్, ఫ్లిప్‌కార్ట్ సంస్థలు భారీ ఆఫర్ల ద్వారా సాధారణ ట్రేడర్లను దెబ్బతీస్తున్నారు. ఈ పండుగ సీజన్‌లో వాల్‌మార్ట్ నేతృత్వంలోని ఫ్లిప్‌కార్ట్ సెప్టెంబర్ 29వ తేదీ నుంచి వరుసగా ఆరు రోజుల పాటు డిస్కౌంట్ సేల్ అందిస్తోంది. అమెజాన్ కూడా తేదీలు ప్రకటించాల్సి ఉంది. ఈ రెండు ఈ-కామర్స్ దిగ్గజాలు కూడా ఫ్యాషన్ నుంచి స్మార్ట్ ఫోన్స్, హోమ్ అప్లియన్సెస్ వరకు భారీ ఆఫర్లు ప్రకటిస్తున్నాయి.

ధరలను ప్రభావితం చేస్తున్న ఈ-కామర్స్ సంస్థలు

ఈ-కామర్స్ సంస్థలు వివిధ ఉత్పత్తులపై 10 శాతం నుంచి 80 శాతం వరకు భారీ డిస్కౌంట్లు ఆఫర్ చేస్తున్నాయని, తద్వారా ధరలను ప్రభావితం చేస్తున్నాయని, నిబంధనలకు విరుద్ధంగా వ్యవహరిస్తున్నాయని కాన్ఫెడరేషన్ ఆఫ్ ఆల్ ఇండియా ట్రేడర్స్ (CAIT) ఆందోళన వ్యక్తం చేసింది. ఈ మేరకు ఫెడరల్ ట్రేడ్ మినిస్టర్‌కు లేఖ రాసింది.

ఇప్పుడు ప్రభుత్వం యాక్షన్ తీసుకోకపోవచ్చు కానీ...

CAIT 5,00,000 మర్చంట్స్, ట్రేడర్స్‌ను కలిగి ఉంది. ఈ-కామర్స్ భారీ సేల్ అమ్మకాలపై నిషేధం విధఇంచాలని ఇది ఎఫ్‌డీఐ నిబంధనలను ఉల్లంఘించడమేనని CAIT పేర్కొంది. ఇప్పటికిప్పుడు ప్రభుత్వం ఈ-కామర్స్ దిగ్గజాల సేల్స్‌ను ఆపలేకపోవచ్చు. కానీ ప్రభుత్వం కొన్ని నిబంధనలు సిద్ధం చేసేందుకు ఈ ఫిర్యాదు ఉపయోగపడుతుంది. తద్వారా ఇప్పుడు కాకపోయినా రేపైనా ట్రేడర్స్ డిమాండుకు ఫలితం ఉండవచ్చు.

ఫ్లిప్‌కార్ట్ సేల్‌తో పాటు బీమా కొనుగోలు

కాగా, ఫ్లిప్‌కార్ట్ అతిపెద్ద సేల్‌ ఆఫర్‌ బిగ్‌ బిలియన్ డే తేదీల్ని ఇటీవల ప్రకటించింది. సెప్టెంబర్ 29వ తేదీ నుంచి అక్టోబర్ 4 వరకు ఈ ఆఫర్‌ ఉంటుంది. ఆరు రోజుల పాటు కొనసాగనున్న ఈ ఆఫర్ ఫ్లిప్‌కార్ట్ ప్లస్ కస్టమర్లకు 4 గంటలు ముందుగానే అందుబాటులోకి వస్తుంది. కార్డుపై కొనుగోళ్లు చేసేవారికి ప్రత్యేక ఆఫర్లు అందిస్తారు. యాక్సిస్, ఐసీఐసీఐ బ్యాంకులతో జతకట్టింది ఫ్లిప్‌కార్ట్. తొలిసారిగా బిగ్ బిలియన్ డే ఆఫర్‌లో ఉపకరణాలకు బీమా కొనుగోలు చేసే అవకాశం కల్పిస్తోంది.