భారత ఆర్థిక వ్యవస్థ అంచనా కంటే బాగా నెమ్మదించిందని ఇంటర్నేషనల్ మానిటరీ ఫండ్ (IMF) గురువారం వెల్లడించింది. ఆర్థిక వృద్ధి మందగించడానికి గల కారణాలను కూడా వెల్లడించింది. కార్పోరేట్, పర్యావరణ రంగానికి సంబంధించి రెగ్యులేటరీలో నెలకొన్ని అనిశ్చితి కారణమని IMF అధికార ప్రతినిధి గేరీ రైస్ వెల్లడించారు. ఎన్‌బీఎఫ్‌సీ బలహీనపడటం కూడా ఆర్థిక వ్యవస్థ నెమ్మదికి కారణమన్నారు.

IMF జూలైలో విడుదల చేసిన నివేదికలో భారత వృద్ధి రేటు అంచనాల్లో 0.3 శాతం తగ్గించి 2019లో ఏడు శాతంగా, 2020లో 7.2 శాతంగా ఉండవచ్చునని విశ్లేషించింది. అయితే అంచనాల కంటే భారీగా తగ్గింది. అయినప్పటికీ అమెరికా, చైనా కంటే వేగవంతమైన వృద్ధి రేటు నమోదు చేస్తోందని కూడా IMF తెలిపింది.

ఇటీవలి త్రైమాసికంలో జీడీపీ రేటు తగ్గడంపై స్పందిస్తూ భారత ఆర్థిక పరిస్థితులను IMF పర్యవేక్షిస్తోందని చెప్పారు. కాగా, క్రిసిల్ కూడా 2019-20 ఆర్థిక వృద్ధి రేటును 20 బేసిస్ పాయింట్లు తగ్గించి 6.9 శాతానికి పరిమితం చేసింది. ఈ ఆర్థిక సంవత్సరం తొలి త్రైమాసికంలో భారత వృద్ధి రేటు ఏడేళ్ల కనిష్టానికి పడిపోయిన విషయం తెలిసిందే.