న్యూఢిల్లీ: ఐటీ రిటర్న్స్ ఫాంలో ఎలాంటి మార్పులు లేవని సెంట్రల్ బోర్డ్ ఆఫ్ డైరెక్ట్ ట్యాక్స్ (CBDT) మంగళవారం స్పష్టం చేసింది. ఆదాయ పన్ను రిటర్న్స్ ఫాంలో చాలా మార్పులు చోటు చేసుకున్నాయని, దీంతో ఐటీ రిటర్న్స్ దాఖలు చేయడంలో పన్ను చెల్లింపుదారులు ఇబ్బందులు ఎదుర్కొంటున్నారని సోషల్ మీడియాలో కథనాలు వచ్చాయి. అయితే అవన్నీ వట్టివేనని CBDT కొట్టిపడేసింది.

'ఏప్రిల్ 1, 2019న నోటిఫికేషన్ జారీ చేసినప్పటి నుంచి ఐటీఆర్ 2, ఐటీఆర్ 3 సహా ఏ ఐటీఆర్ ఫాంలోను ఎలాంటి మార్పులు చేయలేదు.' అని CBDT పేర్కొంది. 'ఐటీఆర్ 2, ఐటీఆర్ 3 రిటర్న్స్ దాఖలు చేసేందుకు ట్యాక్స్ పేయర్స్ ఇబ్బందులు పడుతున్నారని సోషల్ మీడియాలో వార్తలు వచ్చాయి. అవి వాస్తవం కాదు' అని తెలిపింది.

కేవలం ఈ-ఫైలింగ్ కోసం యుటిలిటీ సాఫ్ట్‌వేర్ అప్‌డేట్ అవుతుందని, అంతకుమించి ఇతర మార్పులు ఏవీ చేయలేదని తెలిపింది. మూలంవద్ద పన్ను కోత (TDS) సమాచారం ఆధారంగా ప్రీ-ఫైలింగ్‌ వంటి పలు సౌకర్యాలు ఇందులో భాగంగా ఉందని పేర్కొంది.