హువాయ్ ఫోన్లలో ఇక గూగుల్ యాప్స్ పనిచేయవ్

గూగుల్ గూగ్లీ

హువాయ్‌తో సంబంధాలు దేశ భద్రతకు ముప్పు అనే స్థాయిలో అమెరికా ప్రభుత్వం వ్యవహరిస్తోంది. అందుకే ఈ చైనీస్ కంపెనీకి దూరంగా ఉండాలని వివిధ సంస్థలకు హెచ్చరికలు జారీ చేసింతి వాషింగ్టన్. టెక్నాలజీ షేరింగ్‌పై నిషేధం విధించడంతో గూగుల్ కూడా తలొగ్గక తప్పలేదు. అందుకే తక్షణం గూగుల్‌కు సొంతమైన ప్రొప్రైటరీ సేవలు - జీమెయిల్, జీమ్యాప్స్ సహా మరికొన్ని అనుబంధ యాప్స్ కూడా నిలిచిపోబోతున్నాయి. అయితే గూగుల్ ప్లే, గూగుల్ సెక్యూరిటీ మాత్రం యధావిధిగా కొనసాగుతాయని సంస్థ ప్రకటించింది.

ఆ సేవలకు విఘాతం

యాండ్రాయిడ్ నుంచి ఉచితంగా లభించే సేవలన్నీ కొనసాగుతాయని, అయితే గూగుల్‌కు మాత్రమే యాజమాన్య హక్కులున్న సేవలకు మాత్రం విఘాతం కలుగబోతోంది. దీనికి తోడు కొంత మంది చిప్ మ్యానుఫ్యాక్చరర్స్ కూడా హువాయ్‌కు స్పేర్ పార్ట్స్ ఆపేయబోతున్నారు. వాటిల్లో ఎన్‌విడియా సంస్థ వంటివి ప్రధానంగా ఉన్నాయి. హువాయ్ ప్రస్తుతం ఏడాదికి సుమారు 67 బిలియన్ డాలర్ల విలువైన (రూ.4.69 లక్షల కోట్లు) విడిభాగాలను దిగుమతి చేసుకుంటుంది. అందులో కేవలం యూఎస్ నుంచే సుమారు రూ.77 వేల కోట్ల విలువైన దిగుమతులను చేసుకుంటోంది హువాయ్.

5జీకి ఎఫెక్ట్

చైనాను పూర్తిస్థాయి 5జీగా మార్చాలని ఉవ్విళ్లూరుతున్న హువాయ్‌కు ఇది షాకింగ్ వార్త. ఎందుకంటే గూగుల్ సహకారం లేకుండా 5జీ సేవలను విస్తరించలేదు. యాండ్రాయిడ్ ఓపెన్ సోర్స్ ప్రాజెక్టును వినియోగిస్తే యాప్స్ అన్నింటినీ మ్యాన్యువల్‌గా అప్ డేట్ చేసుకోవాల్సి ఉంటుంది. సాఫ్ట్‌వేర్ సంబంధ సమస్యలు, యాప్స్‌లో ఎప్పటికప్పుడు అప్ డేట్స్ వంటివి కష్టం కానుంది. మరి ఈ సమస్యలన్నింటినీ హువాయ్ ఏ విధంగా పరిష్కరించుకుంటుందో చెప్పడం కష్టమే.