వివిధ నివేదిక‌లు చెపుతున్న‌ట్లుగా ఐటీ రంగంలో భారీ ఉద్యోగాల కోత‌లు ఉండ‌వు అంటూనే, ఈ ఏడాది 1.5 ల‌క్ష‌ల నియామ‌కాలు జ‌రుగుతాయ‌ని నాస్కామ్ వెల్ల‌డించింది. అయితే టెక్కీలు త‌మ‌ను తాము కొత్త నైపుణ్యాల దిశ‌గా మార్చుకోవాల్సి ఉంటుంద‌ని ఐటీ ప‌రిశ్ర‌మ‌ల స‌మాఖ్య సూచించింది. గ‌త కొన్ని నెల‌ల నుంచి విప్రో, ఇన్ఫోసిస్‌, కాగ్నిజెంట్ వంటి సంస్థ‌లు దాదాపు 50 వేల మందిని తొల‌గిస్తాయ‌ని వార్త‌లు వెలువ‌డుతున్న సంగ‌తి తెలిసిందే.

"పెద్ద సంఖ్య‌లో ఉద్యోగుల కోత ఉంటుంద‌న్న దాన్ని మేం అంగీక‌రించం. 2017 ఆర్థిక సంవ‌త్స‌రంలో మొత్తంగా 1.7 లక్ష‌ల మంది కొత్త ఉద్యోగుల‌ను తీసుకున్నాం. కేవ‌లం నాలుగో త్రైమాసికంలోనే ఐదు పెద్ద కంపెనీలు 50 వేల మందిని నియ‌మించుకున్నాయి." అని నాస్కామ్ ప్రెసిడెంట్ ఆర్ చంద్ర‌శేఖ‌ర్ విలేకరుల‌కు వెల్ల‌డించారు. ఆటోమేష‌న్‌, రోబోటిక్స్‌, అన‌లిటిక్స్‌, సైబ‌ర్ సెక్యూరిటీ వంటి సాంకేతిక‌త‌ల‌కు అనుగుణంగా ఉద్యోగులంతా తమ‌ను తాము తీర్చిదిద్దుకోవాల్సిన అవ‌స‌రం ఉంద‌న్నారు. ఎవ‌రైతే త‌మ‌ను తాము నైపుణ్యాల‌ను మెరుగుప‌రుచుకోలేని స్థితిలో ఉన్నారో ప‌రిశ్ర‌మ‌కు వారి అవ‌స‌రం ఉండ‌క‌పోవ‌చ్చ‌న్నారు. ఇంకా స్టార్ట‌ప్‌లు, ఈ-కామ‌ర్స్‌, డిజిట‌ల్ ఇండియా, డిజిట‌ల్ చెల్లింపులు వంటి వాటిల్లో నూత‌న అవ‌కాశాల‌కు తావుంద‌న్నారు. 2025 నాటి క‌ల్లా 30 ల‌క్ష‌ల కొత్త ఉద్యోగాలు పుట్టుకొస్తాయ‌ని చెప్పారు. అయితే ఉద్యోగుల తొల‌గింపు గురించి ఇంత పెద్ద ఎత్తున భ‌యాందోళ‌న‌లు చెల‌రేగుతున్నాయో వివ‌రించ‌డంలో నాస్కామ్ స్ప‌ష్ట‌త క‌న‌బ‌ర‌చ‌లేదు.