దేశ‌ టెలికాం రంగంలో మరో విలీనానికి రంగం సిద్ధమవుతోంది. దేశ టాప్ మొబైల్ నెట్వ‌ర్క్‌ సర్వీసు ప్రొవైడర్‌ ఎయిర్‌టెల్‌, యూనిటెక్‌ నుంచి విడిపోయిన టెలినార్‌ ఇండియాను కొనుగోలు చేయనున్నట్లు ప్రకటించింది. ఈ కొనుగోలులో టెలినార్‌ ఇండియా ఆస్తుల బదలాయింపు అంశం కూడా ఉంటుందని ఎయిర్‌టెల్‌ తెలిపింది. అయితే దీనికి సంబంధించిన ఆర్థిక వివ‌రాలేవీ వెల్ల‌డి అవ్వ‌లేదు. ఇటీవలే ఐడియా - వొడాఫోన్‌ వీలీనం జరగనున్నట్లు వార్తలు వస్తున్న నేపథ్యంలో ఈ కొనుగోలు అంద‌రిలో ఆస‌క్తిని రేపుతోంది.

టెలినార్ ఇండియాకు ఆంధ్ర‌ప్ర‌దేశ్‌, బీహార్‌, మ‌హారాష్ట్ర, గుజ‌రాత్‌, యూపీ(ఈస్ట్‌), యూపీ(వెస్ట్‌), అస్సాం స‌ర్కిళ్ల‌లో నెట్‌వ‌ర్క్ విస్త‌ర‌ణ ఉంది.ఈ స‌ర్కిళ్ల‌లో టెలినార్‌ను చేజిక్కుంచుకుంటే 1800 మెగాహెర్ట్జ్ స్పెక్ట్ర‌మ్‌లో ఎయిర్‌టెల్ సంస్థ‌కు కొత్త‌గా 43.4 మెగాహెర్ట్జ్ స్పెక్ట్రం అద‌నంగా స‌మ‌కూర‌గ‌ల‌దు. ఆయా వార్త‌ల‌తో టెలికాం రంగ షేర్ల‌కు డిమాండ్ ఏర్ప‌డింది. ఎయిర్‌టెల్ దాదాపు 8 శాతం పైకి ఎగ‌సింది. ట్రేడింగ్ ముగిసే స‌రికి కేవ‌లం 1.5% లాభంతో సరిపెట్టుకుంది. క్రితం ముగింపుతో పోలిస్తే రూ.5 లాభ‌ప‌డి 366 వ‌ద్ద ముగిసింది.