వాహనం దొంగిలించినా, బీమాను క్లెయిమ్ చేయవచ్చు? ఇలా చేయండి

మొదట ఇలా చేయండి

ఎన్ని జాగ్రత్తలు తీసుకున్నా వాహనాల దొంగతనం వింటూనే ఉన్నాం. మీ వాహనం దొంగిలించబడితే, మీ వాహనానికి బీమా ఉంటే క్లెయిమ్ చేయవచ్చు. దీంతో కొంత నష్టపరిహారం సమకూరుతుంది. క్లెయిమ్ ప్రాసెస్‌లో భాగంగా మొదట వాహనం దొంగిలించబడినట్లు మీరు గుర్తించిన వెంటనే దగ్గరలోని పోలీస్ స్టేషన్లో ఎఫ్ఐఆర్ నమోదు చేయాలి. దర్యాఫ్తు కోసం వాహనం తయారు చేసిన సంస్థ పేరు, మోడల్, లైసెన్స్ ప్లేట్ నెంబర్ మొదలైన అవసరమైన పూర్తి సమాచారాన్ని పోలీసులకు అందించాలి.

బీమా సంస్థకు సమాచారం

ఎఫ్ఐఆర్ ఫైల్ చేశాక ఈ విషయాన్ని బీమా సంస్థకు తెలియజేయాలి. ఎఫ్ఐఆర్ కాపీని బీమా సంస్థకు ఇవ్వాలి. బీమా క్లెయిమ్ చేయడానికి ఎఫ్ఐఆర్ అత్యంత ముఖ్యమైన డాక్యుమెంట్. ఆ తర్వాత ఆర్టీవోకు సమాచారం ఇవ్వాలి. డాక్యుమెంటేషన్ వర్క్ ప్రారంభించాలి. మోటార్ వాహన చట్టం ప్రకారం వాహన యజమాని వీలైనంత త్వరగా ప్రాంతీయ రవాణా కార్యాలయంలో వెహికిల్ దొంగతనం గురించి తెలియజేయాలి. క్లెయిమ్ ప్రాసెస్ కోసం బీమా సంస్థకు సమర్పించాల్సిన సపోర్టింగ్ డాక్యుమెంట్స్, బదలీ పేపర్లను ఆర్టీవో కార్యాలయం నుండి పొందాలి.

డాక్యుమెంట్స్ అవసరం

క్లెయిమ్ చేయడానికి బీమా సంస్థకు కొన్ని డాక్యుమెంట్స్ ఇవ్వాలి. బీమా పాలసీ కాపీ, ఒరిజినల్ ఎఫ్ఐఆర్ కాపీ, క్లెయిమ్ ఫామ్, డ్రైవింగ్ లైసెన్స్ కాపీ, ఆర్సీ బుక్ కాపీ, ఆర్టీవో బదలీ డాక్యుమెంట్స్, సంబంధిత ఆర్టీవో ఫామ్స్ అవసరం. అలాగే స్థానిక పోలీస్ స్టేషన్లో అధికారులు ఇచ్చిన నో ట్రేస్ రిపోర్టును బీమా సంస్థకు ఇవ్వాలి. క్లెయిమ్ ఆమోదానికి రెండు నెలల నుండి మూడు నెలలు పట్టవచ్చు. వాహనంకు సంబంధించి అన్ని సెట్ల 'కీ'లను ఇవ్వాలి. ఇందులో విఫలమైతే క్లెయిమ్ తిరస్కరించవచ్చు.