పదిహేడేళ్లలో 3,000 శాతం రిటర్న్స్, టీసీఎస్ అదుర్స్

దేశీయ అతిపెద్ద దిగ్గజం టాటా కన్సల్టెన్సీ సర్వీసెస్(TCS) ఐపీవోకు వచ్చినప్పటి నుండి ఇప్పటి వరకు భారీ రిటర్న్స్ అందించింది. టాటా గ్రూప్‌కు ప్రధాన ఆదాయ వనరు టీసీఎస్. గత పదిహేడేళ్ల కాలంలో ఈ సంస్థ వాటాదారులకు 3,000 శాతానికి పైగా రిటర్న్స్ అందించింది. ఈ మేరకు టీసీఎస్ చైర్మన్ ఎన్ చంద్రశేఖరన్ అన్నారు. 2004లో కంపెనీ ఐపీఓలో భాగంగా ఒక్కో షేరు పైన రూ.850 పెట్టుబడిగా పెట్టి ఉంటే, ప్రస్తుతం ఆ పెట్టుబడి విలువ రూ.28,000కు చేరుకుంది.

ఈ మేరకు టీసీఎస్‌ వాటాదారుల 26వ వార్షిక సమావేశం(AGM)లో మాట్లాడుతూ ప్రస్తావించారు. అంతేకాదు, గత ఆర్థిక సంవత్సరం (2020-21)లో కంపెనీ తన నగదు నిల్వల్లో 95 శాతాన్ని వాటాదారులకు పంచినట్లు చెప్పారు. బైబ్యాక్, డివిడెండ్స్ రూపంలో మొత్తం రూ.33,873 కోట్లు షేర్ హోల్డర్లకు చెల్లించినట్లు తెలిపారు.

భవిష్యత్తు అవసరాలకు అనుగుణంగా తమ కంపెనీ నిరంతరం కొత్త సేవలు అందిస్తోందని చంద్రశేఖరన్ అన్నారు. 2020-21 ఆర్థిక సంవత్సరంలో నిర్వహణ లాభాల్లో 25.9 శాతం పురోగతిని నమోదు చేసింది. ప్రతి షేర్ పైన రూ.38 డివిడెండ్ చెల్లిస్తున్నట్లు చెప్పారు.