ఈ అకౌంట్ ఓపెన్ చేస్తే ATM నుండి రూ.1.5 లక్షలు ఉపసంహరణ, రూ.25 లక్షల టాప్-అప్ హెల్త్ కవర్
ప్రముఖ స్మాల్ ఫైనాన్స్ బ్యాంక్ సూర్యోదయ స్మాల్ ఫైనాన్స్ బ్యాంకు సరికొత్త సేవింగ్స్ ఖాతా పథకాన్ని అందుబాటులోకి తెచ్చింది. సంపద వృద్ధితో పాటు బీమా రక్షణ కల్పించేలా ఈ ఖాతాను రూపొందించారు. ఈ పథకం పేరు సూర్యోదయ హెల్త్ అండ్ వెల్నెస్ సేవింగ్స్ అకౌంట్గా పేర్కొంది. ఈ ఖాతా తెరిచిన వారికి ఆకర్షణీయ వడ్డీ రేట్లతో పాటు ఫ్యామిలీకి ఉచిత బీమా, ఆరోగ్య సంరక్షణ, అపరిమిత ఏటీఎం ట్రాన్సాక్షన్స్ వంటి అదనపు ప్రయోజనాలు ఉన్నాయి. ఏటీఎం నుండి నగదు ఉపసంహరణ, వడ్డీ రేటు, టాప్-అప్ హెల్త్ కవర్కు సంబంధించి వివిధ రకాల మంచి ప్రయోజనాలు ఉన్నాయి. ఈ స్కీం ప్రత్యేకత వ్యక్తిగతంగా, కుటుంబాల ఆరోగ్యంపై కూడా శ్రద్ధ తీసుకోవడం గమనార్హం. ఖాతా తెరిచిన తర్వాత ఒక సంవత్సరం పాటు టాప్-అప్ హెల్త్ ఇన్సురెన్స్, హెల్త్ కేర్ ప్యాకేజీ ఉచితం. అలాగే మార్చి 2022 వరకు దేశవ్యాప్తంగా 102 ప్రాంతాల్లో 20 కిలో మీటర్ల దూరం వరకు ఉచిత అంబులెన్స్ సేవ అందుబాటులో ఉంటుంది.
అకౌంట్ ఓపెన్ చేయడానికి అర్హత
- భారతీయ పౌరులు అయి ఉండాలి. వ్యక్తిగతంగా లేదా జాయింట్గా ఖాతాను ఓపెన్ చేయవచ్చు.
- వయసు 18 సంవత్సరాల నుండి 65 సంవత్సరాల మధ్య ఉండాలి.
- సూర్యోదయ హెల్త్ అండ్ వెల్నెస్ సేవింగ్స్ అకౌంట్ తెరిచేందుకు సగటున రూ.3 లక్షల బ్యాలెన్స్ నిర్వహణ, కీలక హెల్త్ డిక్లరేషన్ ఫామ్ అవసరం. అంటే మంత్లీ యావరేజ్ బ్యాలెన్స్ రూ.3 లక్షలు మెయింటెన్ చేయాలి.
- వైద్య అత్యవసరమైనదని, ఇలాంటి ఎమర్జెన్సీ వ్యక్తిని లేదా కుటుంబాలను ఆర్థిక ఇబ్బందుల్లోకి నెట్టే అవకాశాలు ఉంటాయని, ఈ ప్రభావాన్ని కొంత తగ్గించడానికి తాము సూర్యోదయ హెల్త్ అండ్ వెల్నెస్ సేవింగ్స్ అకౌంట్ను ప్రవేశ పెట్టామని సూర్యోదయ స్మాల్ ఫైనాన్స్ బ్యాంకు ఎండీ అండ్ సీఈవో భాస్కర్ బాబు అన్నారు. ఈ స్కీం ద్వారా వారి సంపద పెరగడంతో పాటు ఇలాంటి అత్యవసర పరిస్థితుల్లో ఈ అకౌంట్ ఓపెన్ చేసిన వారి జేబు నుండి డబ్బులు ఖర్చు చేయవలసిన అవసరం లేదని తెలిపారు.
ఫీచర్స్
- ప్లాటినమ్ రుపే సెక్యూర్ చిప్ డెబిట్ కార్డ్ వేరియంట్ ఉచితం.
- ప్రతి రోజు ఏటీఎం నుండి రూ.1.50 లక్షల నగదును ఉపసంహరించుకోవచ్చు.
- రోజు POS ఉపయోగ పరిమితి రూ.3 లక్షలు. (ట్రాన్సాక్షన్ వ్యాల్యూ)
- ఎగ్జిస్టింగ్ సేవింగ్స్ అకౌంట్ కస్టమర్ తన ఖాతాను హెల్త్ అండ్ వెల్నెస్ సేవింగ్స్ అకౌంట్కు అప్ గ్రేడ్ చేసుకోవచ్చు.
ప్రయోజనాలు
- హెల్త్ అండ్ వెల్నెస్ సేవింగ్స్ అకౌంట్ ఖాతా తెరిస్తే మీరు, మీ జీవిత భాగస్వామి, ఇద్దరు పిల్లలు(మొత్తం నలుగురు కుటుంబ సభ్యులకు కలిపి) రూ.25 లక్షల టాప్-అప్ ఆరోగ్య బీమా ఉంటుంది. అయితే, ఇక్కడ రూ.5 లక్షలు డెడక్టబుల్ అనే విషయం గుర్తించాలి. అంటే మీ వైద్య ఖర్చులు రూ.5 లక్షలు మించితే ఆపై మొత్తాన్ని మాత్రమే టాప్-అప్ ఆరోగ్య బీమా కింద క్లెయిం చేసుకోగలుగుతారు.
- నలుగురు కుటుంబ సభ్యులకు ఆరోగ్య సంరక్షణ. తొలి ఏడాది ఎంపిక చేసిన ఆసుపత్రుల్లో రెండుసార్లు వైద్య నిపుణులతో ఫోన్/వీడియో కన్సల్టేషన్ ఉచితం.
- ఒక్కోటి రూ.500 విలువ చేసే నాలుగు ఔషధ ఓచర్స్. రెండు డెంటల్ కన్సల్టేషన్ ఓచర్స్. రెండు డైట్ ఫిట్ ఓచర్స్.
- మార్చి 31, 2022 వరకు ఎమర్జెన్సీ అంబులెన్స్ సేవలు.
- సేవింగ్స్ పైన 6.25 శాతం వడ్డీ లభిస్తుంది. ఇది నెలనెల ఖాతాలో జమ అవుతుంది.
- ఏ బ్యాంకుకు చెందిన ఏటీఎంలో అయినా అపరిమిత లావాదేవీలు చేయవచ్చు.
- రూ.2 లక్షల జీవిత బీమా. శాశ్వత అంగవైకల్యానికీ ఈ బీమా వర్తిస్తుంది.