అల్ఫాబెట్ కొత్త సీఈవో సుందర్ పిచాయ్.. వార్షిక వేతనం ఎంతో తెలుసా?

ప్రపంచంలోనే అత్యధిక వేతనం...

గూగుల్ మాతృసంస్థ ‘అల్ఫాబెట్' సీఈవోగా సుందర్ పిచాయ్ ప్రపంచంలోనే అత్యధిక వేతనం తీసుకుంటున్న కార్పొరేట్ సీఈవోలలో ఒకరిగా నిలవనున్నారు. 2020 నుండి పిచాయ్‌ అందుకోనున్న (టేక్‌ హోమ్) వార్షిక వేతనం 20 లక్షల డాలర్లు. అంటే మన కరెన్సీలో దాదాపు రూ.14 కోట్లు. ఈ మేరకు ఇటీవల సెక్యూరిటీస్ ఎక్స్ఛేంజ్ కమిషన్(సెక్)కు అల్ఫాబెట్‌ వెల్లడించింది.

24 కోట్ల డాలర్ల స్టాక్ అవార్డ్ కూడా...

అంతేకాదు, రూ.14 కోట్ల వార్షిక వేతనానికి తోడు వచ్చే మూడేళ్లలో 24 కోట్ల డాలర్లు.. అంటే దాదాపు రూ.1700 కోట్లు విలువ చేసే షేర్లు కూడా ఆయనకు లభించనున్నాయి. అయితే ఇందులో 9 కోట్ల డాలర్లు(రూ.630 కోట్లు) షేర్లు.. అల్ఫాబెట్ కనబరిచే పనితీరుపై ఆధారపడి ఉంటాయి. అయితే సంస్థ పనితీరుతో ఏమాత్రం సంబంధం లేకుండా మరో రెండు స్టాక్ అవార్డులు ( 12 కోట్ల డాలర్లు, 3 కోట్ల డాలర్లు) కూడా ఆయన పొందుతారు. ఇటు గూగుల్‌తోపాటు అటు దాని మాతృసంస్థ అల్ఫాబెట్ సీఈవోగానూ బాధ్యతలు నిర్వర్తిస్తున్నందుకుగాను ఈ మేరకు పరిహార ప్యాకేజీని ఆయనకు అందజేస్తున్నారు.

2015లో గూగుల్ సీఈవో అయినప్పుడు...

భారీ వార్షిక వేతనాలు, నజరానాలు సుందర్ పిచాయ్‌కు కొత్తేమీ కాదు. 2015లో గూగుల్ సీఈవోగా బాధ్యతలు చేపట్టినప్పుడు ఆయన అందుకున్న వార్షిక వేతనం 6.52 లక్షల డాలర్లు. ఆ తరువాతి కాలంలో ఈ మొత్తం భారీగా పెరిగింది. ఫలితంగా ప్రపంచంలోనే అత్యధిక వేతనం పొందుతున్న కార్పొరేట్ సీఈవోల్లో పిచాయ్ కూడా ఒకరయ్యారు. ఇక 2016లోనే ఆయన 200 మిలియన్ డాలర్ల విలువైన షేర్లు పొందారు. ఆ తరువాత 2018లోనూ మరిన్ని షేర్ల రూపంలో ఆయనకు నజరానా ఇవ్వబోగా.. అందుకు ఆయన నిరాకరించినట్లు అప్పట్లో వార్తలు కూడా వెలువడ్డాయి.

ఇంతింత వేతనం ఇవ్వడం.. అవసరమా?

అయితే గూగుల్, అల్ఫిబెట్ సంస్థలకు సారథ్యం వహిస్తోన్న సుందర్ పిచాయ్‌కు ఇలా భారీ వేతన ప్యాకేజీలు, కోట్ల విలువైన షేర్లు ఇస్తుండడంపై ఇటీవల జరిగిన ఉద్యోగుల సమావేశంలో ఓ ఉద్యోగి అభ్యంతరం వ్యక్తం చేసినట్లు తెలుస్తోంది. అయినప్పటికీ పిచాయ్ ప్రతిభ, ఆయన కనబరుస్తోన్న పనితీరును గుర్తించిన అల్ఫాబెట్ సహ వ్యవస్థాపకులు గూగుల్‌తోపాటు దాని మాతృసంస్థ పగ్గాలను సైతం ఆయన చేతిలోనే పెట్టడం గమనార్హం.