రిలయన్స్ చేతికి 'ఫ్యూచర్' బిగ్‌బజార్, డీల్ వ్యాల్యూ రూ.24,713 కోట్లు

బిగ్ బజార్ సహా ఇవి రిలయన్స్ చేతికి.. ఒప్పందంలో ఇవి లేవు

ఫ్యూచర్ గ్రూప్‌కు చెందిన రిటైల్, హోల్‌సేల్ విభాగాల్ని కొనుగోలు చేయడంతో ఈ రంగంపై మరింత దృష్టి సారించడానికి వీలవుతుందని రిలయన్స్ రిటైల్ వెంచర్ లిమిటెడ్ డైరెక్టర్ ఈషా అంబానీ అన్నారు. ప్రస్తుతం రిలయన్స్ రిటైల్ 1,800 స్టోర్స్‌ కలిగి ఉందని, ఇప్పుడు ప్యూచర్ గ్రూప్‌కు చెందిన మరో 1,800 స్టోర్స్ జత కలుస్తున్నాయన్నారు. దేశవ్యాప్తంగా 420కి పైగా నగరాల్లో విస్తరించాయి. ఫ్యూచర్ గ్రూప్‌కు చెందిన బిగ్ బజార్, ఈజీడే, బ్రాండ్ ఫ్యాక్టరీకి చెందిన ఫ్యూచర్ లైఫ్ స్టైల్ ఫ్యాషన్ విభాగాలు రిలయన్స్ రిటైల్‌తో కలుస్తాయి. కాగా, తయారీ, ఇంటిగ్రేటెడ్ ఫ్యాషన్ సోర్సింగ్, ఇన్సూరెన్స్ విభాగాలు మాత్రమే ఫ్యూచర్‌ గ్రూప్ కింద ఉంటాయి.

13 శాతం వాటా.. ఇక అనుమతి తరువాయి

ఫ్యూచర్ ఎంటర్‌ప్రైజెస్‌లో 13 శాతానికి పైగా వాటాను కూడా సొంతం చేసుకుంది రిలయన్స్ రిటైల్. ఈ ఒప్పందం కాంపోజిట్ స్కీం ఆఫ్ అరేంజ్‌మెంట్ కింద జరుగుతుందని, కొనుగోలు విలువలో సర్దుబాటు ఉండవచ్చునని వెల్లడించింది. ప్రతిపాదిత కొనుగోలు ఫ్యూచర్ గ్రూప్ చేపట్టిన విలీనంలో భాగంగా ఉండనుంది. ఈ ఒప్పందానికి సెబి, సిసిఐ, ఎన్సీఎల్టీ, షేర్ హోల్డర్స్ అనుమతి లభించాల్సి ఉంది. దేశంలో విస్తరిస్తున్న రిటైల్ వ్యాపారాన్ని మరింత పెంచుకోవడంతో పాటు అమెజాన్ నుండి పోటీని సమర్థవంతంగా ఎదుర్కోవడానికి ఈ-కామర్స్ వ్యాపారంలో మరింత పోటీని పెంచే దిశగా రిలయన్స్ ముందుకు సాగుతోంది. 2017లో 800 బిలియన్ డాలర్లుగా ఉన్న మన దేశ రిటైల్ మార్కెట్ 2026 నాటికి 1.75 ట్రిలియన్ డాలర్లకు చేరుతుందని అంచనాలు ఉన్నాయి. కరోనా, ఆర్థిక పరిస్థితుల మూలంగా తలెత్తిన సవాళ్లకు, పునర్వ్యవస్థీకరణ, తాజా లావాదేవీ ఫలితంగా సంస్థకు సంపూర్ణపరిష్కారం లభిస్తుందని ఫ్యూచర్ గ్రూప్ సీఈవో కిషోర్ బియానీ అన్నారు.

కొనుగోలు ఇలా..

కాంపొజిట్ స్కీమ్ ఆఫ్ అరేంజ్‌మెంట్ స్కీంలో భాగంగా రిలయన్స్ ఈ కొనుగోలు చేస్తోంది. ఇందులో భాగంగా ఫ్యూచర్ గ్రూప్ తన రిటైల్, హోల్‌సేల్, లాజిస్టిక్స్, వేర్‌హౌజింగ్ వ్యాపారాల్ని ఫ్యూచర్ ఎంటర్‌ప్రైజెస్ లిమిటెడ్‌లో విలీనం చేస్తుంది. ఫ్యూచర్ గ్రూప్ రిటైల్, హోల్‌సేల్‌ వ్యాపారాలు రిలయన్స్ రిటైల్ వెంచర్ లిమిటెడ్ పూర్తి అనుబంధ విభాగమైన రిలయన్స్‌ రిటైల్ అండ్‌ ఫ్యాషన్ లైఫ్‌స్టైల్ లిమిటెడ్‌కు బదిలీ అవుతాయి. లాజిస్టిక్స్, వేర్‌హౌజింగ్ విభాగాలు నేరుగా రిలయన్స్ రిటైల్ వెంచర్ లిమిటెడ్ బదిలీ కానున్నాయి. ఈ డీల్‌లో భాగంగా రిలయన్స్ రిటైల్ అండ్ ఫ్యాషన్ లైఫ్ స్టైల్ లిమిటెడ్ పెట్టుబడులు పెట్టనుంది. విలీనం తర్వాత ఫ్యూచర్ ఎంటర్‌ప్రైజెస్ లిమిటెడ్‌లో 6.09% వాటా కోసం ఈక్విటీ షేర్ల ప్రిఫరెన్షియల్ ఇష్యూలో రూ.1,200 కోట్లు, ఈక్విటీ వారంట్ల ప్రిఫరెన్షియల్ ఇష్యూలో మరో రూ.400 కోట్లు. వీటిని ఈక్విటీగా మార్చుకోవడం ద్వారా మరో 7.05 శాతం వాటా లభిస్తుంది.