తగ్గిన ఆఫీస్ స్పేస్ లీజింగ్ డిమాండ్, బెంగళూరు టాప్, రెండో స్థానంలో హైదరాబాద్

కరోనా మహమ్మారి నేపథ్యంలో ఉద్యోగులకు వర్క్ ఫ్రమ్ హోమ్ కారణంగా చిన్నస్థాయి నుండి పెద్ద కంపెనీల వరకు కార్యాలయాలను ఖాళీ చేయడమో లేదా తగ్గించడమో చేశాయి. దీంతో ఆఫీస్ స్పేస్ లీజింగ్ డిమాండ్ భారీగా పడిపోయింది. దేశవ్యాప్తంగా ఏడు ప్రధాన నగరాల్లో వాణిజ్య స్థలాలకు జూలై-సెప్టెంబర్ త్రైమాసికంలో 50 శాతం మేర క్షీణించినట్లు జేఎల్ఎల్ నివేదిక తెలిపింది. జనవరి నుండి సెప్టెంబర్ వరకు చూస్తే 47 శాతం పడిపోయింది. ఢిల్లీ-ఎన్సీఆర్, ముంబై, కోల్‌కతా, చెన్నై, పుణే, హైదరాబాద్, బెంగళూరు నగరాల్లో ఆఫీస్ స్పేస్ గిరాకీ పడిపోయింది.

సగానికి తగ్గిన ఆఫీస్ స్పేస్ లీజింగ్

సెప్టెంబర్ క్వార్టర్‌లో నెట్ ఆఫీస్ స్పేస్ లీజింగ్ 5.4 మిలియన్ స్క్వేర్ ఫీట్స్‌కు పరిమితమైంది. అంతకుముందు ఏడాది ఇదే క్వార్టర్‌తో పోలిస్తే 50 శాతానికి తగ్గింది. జనవరి-సెప్టెంబర్ 2020 ఆఫీస్ స్పేస్ లీజింగ్ 17.3 మిలియన్ చదరపు అడుగులకు పరిమితమైంది. ఏడు ప్రధాన నగరాల్లో 2019లో ఇదే కాలంలో 32.7 మిలియన్ చదరపు అడుగులతో పోలిస్తే 47 శాతం క్షీణించింది. కరోనా నేపథ్యంలో కార్పోరేట్స్, కో-వర్కింగ్ కంపెనీలు తమ విస్తరణ ప్రణాళికలు వాయిదా వేయడంతో పాటు వర్క్ ఫ్రమ్ హోమ్ విధానం ఆఫీస్ స్పేస్ లీజ్ తగ్గడానికి కారణం. అయితే జూన్ క్వార్టర్‌తో పోలిస్తే సెప్టెంబర్ త్రైమాసికంలో ఆఫీస్ స్పేస్ లీజింగ్ 64 శాతం వృద్ధిని నమోదు చేసింది.

హైదరాబాద్ సహా ఏ నగరంలో ఎంత అంటే

జూలై-సెప్టెంబర్ త్రైమాసికంలో బెంగళూరు నెట్ ఆఫీస్ లీజింగ్ 2.72 మిలియన్ చదరపు అడుగులతో మొదటి స్థానంలో నిలిచింది. ఆ తర్వాత హైదరాబాద్ 1.54 మిలియన్ చదరపు అడుగులతో రెండో స్థానంలో ఉంది. పుణే 0.46 మిలియన్ చదరపు అడుగులు, ముంబై 0.28 మిలియన్ చదరపు అడుగులు, చెన్నై 0.21 మిలియన్ చదరపు అడుగులు, ఢిల్లీ-ఎన్సీఆర్ 0.2 మిలియన్ చదరపు అడుగులు, కోల్‌కతా 0.02 మిలియన్ చదరపు అడుగులతో ఉన్నాయి. రెండో క్వార్టర్‌తో పోలిస్తే మూడో క్వార్టర్‌లో కార్యాలయాల అద్దెలు బెంగళూరులో స్వల్పంగా పెరగగా, మిగిలిన ఆరు నగరాల్లో స్థిరంగా ఉన్నట్లు జేఎల్ఎల్ తెలిపింది.

ఆఫీస్ స్పేస్ వెకెన్సీ

ఆఫీస్ ఖాళీ స్పేస్ రెండో జూన్ క్వార్టర్‌తో పోలిస్తే సెప్టెంబర్ క్వార్టర్‌లో పెరిగింది. ఏప్రిల్-జూన్ మధ్య మొత్తం వేకన్సీ 13.1శాతం కాగా, జూలై-సెప్టెంబర్ త్రైమాసికంలో 13.5 శాతానికి పెరిగింది. 2019 క్యాలెండర్ ఏడాదిలో 47 మిలియన్ చదరపు అడుగులతో ఆఫీస్ స్పేస్ డిమాండ్ రికార్డ్ స్థాయిలో ఉంది. ఇప్పుడు కరోనా ఆఫీస్ డిమాండ్ పైన ప్రభావం చూపుతోంది.