Hyderabad:హైదరాబాద్ వాసులకు గుడ్ న్యూస్: మారుతున్న నగరం ముఖచిత్రం.. కొత్త ఫ్లైఓవర్లు ఇవే!

హైదరాబాద్ (Hyderabad) నగరం రోజురోజుకూ విస్తరిస్తోంది. పెరిగే జనాభా, వాహనాల రద్దీకి అనుగుణంగా మౌలిక సదుపాయాలను మెరుగుపరచడం ఇప్పుడు అత్యవసరం. ఈ క్రమంలోనే తాజాగా జరిగిన జీహెచ్‌ఎంసీ (GHMC) సమావేశంలో నగరాభివృద్ధికి సంబంధించి పలు కీలక నిర్ణయాలు తీసుకున్నారు. ముఖ్యంగా పాతబస్తీ నుంచి హైటెక్ సిటీ వరకు ట్రాఫిక్ ఇబ్బందులను తొలగించేలా కొత్త ప్రాజెక్టులకు గ్రీన్ సిగ్నల్ ఇచ్చారు.

పాతబస్తీలో పార్కింగ్ సమస్యకు పరిష్కారం

చౌమహల్లా ప్యాలెస్ , ఖిల్వత్ ప్రాంతాలకు వెళ్లే పర్యాటకులు, స్థానికులు ఎదుర్కొంటున్న ప్రధాన సమస్య పార్కింగ్. దీనిని దృష్టిలో ఉంచుకుని, చౌమహల్లా ప్యాలెస్ సమీపంలో ఒక భారీ మల్టీ లెవల్ పార్కింగ్ కాంప్లెక్స్ నిర్మాణానికి అధికారులు ఆమోదం తెలిపారు. ఇది పూర్తయితే పాతబస్తీ వీధుల్లో ట్రాఫిక్ రద్దీ గణనీయంగా తగ్గే అవకాశం ఉంది.

ఫ్లైఓవర్లు , అండర్ పాస్‌ల నిర్మాణం

హైదరాబాద్ నగరంలో కీలక జంక్షన్ల వద్ద ప్రయాణం నరకప్రాయంగా మారుతోంది. దీనిని అధిగమించడానికి..

• రసూల్‌పురా జంక్షన్: ఇక్కడ 4-లేన్ల వన్-వే రోడ్డు నిర్మాణానికి ప్లాన్ చేశారు. ఇందుకోసం 26 ఆస్తుల సేకరణకు కూడా అనుమతి లభించింది.
• ఓవైసీ జంక్షన్: ఇక్కడి ఫ్లైఓవర్ నుంచి సంతోష్ నగర్ వైపు వెళ్లేందుకు వీలుగా కొత్త రాంప్ నిర్మించనున్నారు.
• పంజాగుట్ట ఏరియా: ఎన్ఎఫ్సీఎల్ (NFCL) , టీవీ9 జంక్షన్ల వద్ద కొత్త ఫ్లైఓవర్లు, అండర్ పాస్ పనులకు అడుగులు పడ్డాయి.
• రేతిబౌలి - నానల్‌నగర్: ఇక్కడ ఫ్లైఓవర్ , గ్రేడ్ సెపరేటర్ల నిర్మాణం కోసం 106 ప్రాపర్టీలను సేకరించాలని నిర్ణయించారు.

రైల్వే ఓవర్ బ్రిడ్జిలు (ROB) , ఇతర పనులు

ఫలక్‌నుమా వద్ద ఉన్న ట్రాఫిక్ ఇబ్బందులను తొలగించడానికి పాత బ్రిడ్జికి సమాంతరంగా కొత్త ROB (రైల్వే ఓవర్ బ్రిడ్జి) నిర్మించనున్నారు. అలాగే ఫతేనగర్ ఫ్లైఓవర్ పునరుద్ధరణ, అఫ్జల్ సాగర్ నాలా పునర్నిర్మాణం వంటి పనులు కూడా జాబితాలో ఉన్నాయి. పాటిగడ్డ వద్ద కూడా కొత్త ఆర్‌ఓబీకి గ్రీన్ సిగ్నల్ ఇచ్చారు. వీటితో పాటు బర్కత్‌పురా జంక్షన్ వద్ద మాజీ ప్రధాని అటల్ బిహారీ వాజ్‌పేయి విగ్రహాన్ని ఏర్పాటు చేయాలని నిర్ణయించడం విశేషం.

సైబరాబాద్, మల్కాజ్‌గిరికి భారీ నిధులు

నగరంలోని ఐటీ హబ్ అయిన సైబరాబాద్ , జనసాంద్రత కలిగిన మల్కాజ్‌గిరి పరిధిలోని మున్సిపల్ కార్పొరేషన్లకు తలో రూ. 500 కోట్లు కేటాయించారు. ఈ నిధులతో ఆయా ప్రాంతాల్లో రోడ్ల విస్తరణ, డ్రైనేజీ వ్యవస్థ మెరుగుదల వంటి పనులు చేపట్టనున్నారు. మైలార్‌దేవ్‌పల్లి - శంషాబాద్ రోడ్ - కాటేదాన్ జంక్షన్ల వద్ద 6-లేన్ల భారీ గ్రేడ్ సెపరేటర్ నిర్మాణానికి కూడా ప్రభుత్వం సిద్ధమైంది.
మొత్తానికి ఈ కొత్త ప్రాజెక్టులు అందుబాటులోకి వస్తే హైదరాబాద్(Hyderabad) సిటీలో ప్రయాణం మరింత వేగవంతం కావడమే కాకుండా నగర రూపురేఖలు మారిపోతాయనడంలో సందేహం లేదు.