అమెరికా వెలుపల... హైదరాబాద్‌లోనే రెండో అతిపెద్ద గూగుల్ కార్యాలయం!

అవగాహన ఒప్పందం

తెలంగాణ, గూగుల్ మధ్య అవగాహన ఒప్పందం కుదిరింది. పౌర సేవలు, విద్య, ఇతర రంగాల్లో ప్రభుత్వానికి గూగుల్ సాంకేతిక సహకారాన్ని అందిస్తుంది. ఇప్పటికే అనేక ప్రాజెక్టుల్లో గూగుల్‌తో కలిసి పని చేస్తున్నట్లు కేటీఆర్ తెలిపారు. ఈ ఒప్పందంతో మరింత మెరుగైన సేవలు అందించేందుకు అవకాశం ఏర్పడుతుందన్నారు. హైదరాబాద్‌లో గూగుల్ తన మూలాలను మరింత బలోపేతం చేయడానికి సంతోషంగా ఉందన్నారు. గూగుల్ 2017 నుండి తెలంగాణ ప్రభుత్వంతో కలిసి పని చేస్తోందన్నారు. ఇంతకుముందు చేసుకున్న ఎంవోయులు గొప్ప కార్యక్రమాలకు దారి తీశాయని, యువత, మహిళలు, విద్యార్థులు, పౌరసేవల్లో మార్పు తీసుకు రావడంపై దృష్టి సారించామన్నారు.

మరింత దృఢంగా..

గూగుల్ ఇండియా వైస్ ప్రెసిడెంట్ అండ్ కంట్రీ హెడ్ సంజయ్ గుప్తా మాట్లాడుతూ... హైదరాబాద్ కేంద్రంగా కార్యకలాపాలను ప్రారంభించడంతో తెలంగాణతో తమ అనుబంధం మరింత దృఢంగా మారిందన్నారు. ప్రపంచంలో అత్యధిక మంది ఉద్యోగులు పని చేసే కేంద్రాల్లో ఇది కూడా ఒకటి అన్నారు.

హైదరాబాద్ కేంద్రంగా

మైక్రోసాఫ్ట్, అమెజాన్‌లు అమెరికాలోని తమ ప్రధాన కార్యాలయాలను మినహాయించి, వెలుపల హైదరాబాద్‌లోనే అతిపెద్ద కార్యాలయాలను నిర్మిస్తున్నట్లు గతంలోనే ప్రకటించాయి. ఇప్పుడు గూగుల్ అదే దారిలో నడిచింది. హైదరాబాద్ గూగుల్ కార్యాలయంలో పెద్ద ఎత్తున ఉద్యోగులు ఉన్నారు. గూగుల్‌కు ఇప్పటికే హైదరాబాద్‌లోని పలు ప్రాంతాల్లో 30 లక్షల చదరపు అడుగుల సామర్థ్యం కలిగిన బిల్డింగ్ కెపాసిటీ ఉంది. ఇప్పుడు మరో 30.3 లక్షల చదరపు అడుగుల సామర్థ్యం కలిగిన భవనం నిర్మిస్తోంది.