2009 కంటే డబుల్ సంక్షోభం: దారుణంగా పడిపోనున్న భారత ఆర్థిక వ్యవస్థ, ఏడాదిలో దూకుడు

కరోనా మహమ్మారి కారణంగా ప్రపంచ దేశాల వృద్ధి రేటు భారీగా పడిపోతోంది. 2020-21 ఆర్థిక సంవత్సరానికి గాను భారత వృద్ధి రేటును ఫిచ్ రేటింగ్స్ 0.8 శాతంగా ఉంటుందని అంచనా వేసింది. కరోనా వైరస్, సుదీర్ఘ లాక్ డౌన్ కారణంగా ప్రపంచవ్యాప్తంగా తీవ్ర ఆర్థిక సంక్షోభం కనిపిస్తోందని పేర్కోంది. భారత్ పైన కూడా తీవ్ర ప్రభావం కనిపిస్తోందని పిచ్ రేటింగ్స్ తన గ్లోబల్ ఎకనమిక్ ఔట్‌లుక్‌లో తెలిపింది.

2021-22లో భారీ వృద్ధి

2020 ఏప్రిల్ నుండి 2021 మార్చి ఆర్థిక సంవత్సరానికి గాను భారత వృద్ధి రేటు 0.8 శాతానికి పడిపోతుందని తెలిపింది. అంతకుముందు ఇదే ఫిచ్ రేటింగ్స్ 4.9 శాతం అంచనా వేసింది. అదే సమయంలో 2021-22 ఆర్థిక సంవత్సరంలో భారత వృద్ధి రేటు భారీగా పుంజుకొని 6.7 శాతానికి చేరుకుంటుందని అంచనా వేసింది.

వరుస క్వార్టర్‌లలో మైనస్

వృద్ధి రేటు ఈ ఆర్థిక సంవత్సరంలో వరుసగా రెండు త్రైమాసికాల్లో మైనస్‌లలో ఉంటుందని ఫిచ్ రేటింగ్స్ తెలిపింది. ఏప్రిల్ - జూన్ క్వార్టర్‌లో మైనస్ 0.2 శాతం, జూలై - సెప్టెంబర్ క్వార్టర్‌లో మైనస్ 0.1 శాతం ఉంటుందని తెలిపింది. అక్టోబర్-డిసెంబర్ క్వార్టర్‌లో వృద్ధి 1.4 శాతంగా ఉంటుందని, జనవరి-మార్చి క్వార్టర్‌లో 4.4 శాతం వృద్ధి రేటు ఉంటుందని పేర్కొంది.

వినియోగ వ్యయం భారీగా తగ్గడం వల్లే

భారత వృద్ధి రేటు భారీగా పడిపోవడానికి ప్రధాన కారణంగా కన్స్యూమర్ స్పెండింగ్ తగ్గిపోవడమే కారణమని ఫిచ్ రేటింగ్స్ తెలిపింది. ఈ ఆర్థిక సంవత్సరంలో 0.3 శాతంగా మాత్రమే ఉంటుందని పేర్కొంది. గత ఏడాది ఇది 5.5 శాతంగా ఉంది.

ప్రపంచ ఆర్థిక వ్యవస్థ..

2020 క్యాలెండర్ ఇయర్‌లో ప్రపంచ ఆర్థిక వ్యవస్థ 3.9 శాతం తగ్గుతుందని ఫిచ్ రేటింగ్స్ తెలిపింది. 2009 సంక్షోభం కంటే రెండింతలు తీవ్రమని తెలిపింది. వైరస్ కారణంగా 2020లో ప్రపంచ జీడీపీలో 4.5 ట్రిలియన్ డాలర్ల నష్టమని తెలిపింది.