లాప్స్ అయిన పాలసీని తిరిగి యాక్టివ్ చేసుకోవడం ఎలా:వడ్డీ ఎంత కట్టాలి..?
ఈ రోజుల్లో ప్రతి ఒక్కరం బీమా కలిగి ఉన్నాం. ఇన్ష్యూరెన్స్ అనేది ఈ రోజుల్లో సర్వ సాధారణమైపోయింది. అయితే ఇన్ష్యూరెన్స్ అనేది దీర్ఘకాలంలో ఉండటం వల్ల కొందరు తమకు సాధ్యపడినంత వరకు మాత్రమే బీమా కొనసాగిస్తున్నారు. మధ్యలోనే డబ్బులు చెల్లించకుండా అలాగే వదిలేస్తున్నారు. పాలసీని మధ్యలోనే నిలిపివేసేందుకు చాలా కారణాలు ఉండొచ్చు. డబ్బులు సమయానికి లేకపోవడంతో పాటు ఇతరత్ర ఆర్థిక కారణాలు కూడా ఉండొచ్చు. ఇక కొందరైతే పాలసీ సంస్థలు పెట్టే నిబంధనలు, లేదా ఎలా రెన్యూ చేసుకోవాలో తెలియక ఇబ్బందులు పడుతూ బీమా పాలసీలకు స్వస్తి పలుకుతున్నారు. మధ్యలోనే వదిలేసిన పాలసీలను తిరిగి ఎలా రెన్యూ చేసుకోవాలో తెలుసుకుందాం.
గతంలో ఓ పాలసీని తీసుకుని ఆ తర్వాత మధ్యలో కొనసాగించకపోతే... అదే పాత ప్లాన్ను కంటిన్యూ చేయడం ఉత్తమమని నిపుణులు చెబుతున్నారు. మధ్యలో డబ్బులు చెల్లించకుండా వదిలేసినందుకు కొన్ని బెనిఫిట్స్ కోల్పోవచ్చు... కానీ తిరిగి కొనసాగించడమే మంచి నిర్ణయమని చెబుతున్నారు. ఎందుకంటే ఆ పాలసీకి ఇదివరకే ప్రీమియం డబ్బులు చెల్లించి ఉంటారు కాబట్టి అదే కంటిన్యూ చెయడం చాలా బెటర్ అని చెబుతున్నారు. అది కాక.. కొత్త పాలసీ తీసుకుంటే అది ప్రస్తుత పరిస్థితుల్లో కట్టాల్సిన ప్రీమియం పెరిగి ఉండొచ్చు.అదే సమయంలో మీ ఆరోగ్య పరిస్థితి కూడా కాస్త బాగుండకపోవచ్చు.
ఇక జీవిత బీమా దీర్ఘకాలంలో మంచి పొదుపులానే కాకుండా ఆ సమయానికి మంచి బెనిఫిట్స్ ఇస్తాయి. తొలిసారి కట్టిన ప్రీమియం అలా చివరి వరకు కడుతూ పోతే అదంతా సేవింగ్స్ కిందకే వస్తుంది. అందుకే పాత పాలసీనే కొనసాగించాలని నిపుణులు సూచిస్తున్నారు.పాతది ఆపేసి కొత్త పాలసీ కోసం వెళుతున్నట్లయితే మీరు నష్టపోవాల్సి ఉంటుంది. పెరిగిన వయస్సుతో పాటు ప్రీమియం కూడా పెరుగుతుంది. ఇది కచ్చితంగా పరిగణలోకి తీసుకోవాలని నిపుణులు సూచిస్తున్నారు. ఒక పాలసీదారుడు ఏ సమయంలోనైనా ఏ కారణంచేతైనా గ్రేస్ పీరియడ్లోగా డబ్బులు చెల్లించకపోతే పాలసీ లాప్స్ అవుతుంది. అయితే లాప్స్ అయిన పాలసీని తిరిగి యాక్టివ్ అయ్యేలా మార్చుకోవచ్చు.
పాలసీని యాక్టివ్ చేసుకునేందుకు ముందుగా ప్రీమియంతో పాటు కొంత వడ్డీని పెనాల్టీ రూపంలో చెల్లించాల్సి ఉంటుంది.ఒకవేళ పాలసీదారుడు తిరిగి తాజాగా మెడికల్ చెకప్ చేసుకున్నట్లయితే ఇన్ష్యూరెన్స్ కంపెనీ కొన్ని మెడికల్ ఛార్జీలు విధించే అవకాశం ఉంది. పాలసీ లాప్స్ అయిన ఆరునెలల్లోగా ఇన్ష్యూరెన్స్ కంపెనీని సంప్రదించి పెనాల్టీ కట్టి తిరిగి ఆ పాలసీని యాక్టివ్గా మార్చుకోవచ్చు. ఒక వేళ పాలసీ లాప్స్ అయి ఆరునెలలు దాటితే ముందుగా బాకీ ఉన్న ప్రీమియంతో పాటు 12 నుంచి 18శాతం పెనాల్టీ రూపంలో వడ్డీ కట్టాల్సి ఉంటుందని నిపుణులు చెప్పారు.