1987లో తొలిసారిగా...

మైక్రోసాఫ్ట్ సహ వ్యవస్థాపకుడు బిల్ గేట్స్ 1987లో తొలిసారిగా ఫోర్బ్స్ ప్రపంచ కుబేరుల జాబితాలో నంబర్ వన్ స్థానం పొందారు. అప్పుడు ఆయన సంపద విలువ 1.25 బిలియన్ డాలర్లు. అప్పట్నించి 24 ఏళ్లపాటు ఆ పీఠాన్ని ఏటా ఆయనే దక్కించుకుంటూ వచ్చారు. కానీ 2018లో అమెజాన్ ఇన్‌కార్పొరేషన్ ఫౌండర్, సీఈవో జెఫ్ బెజోస్ బిల్ గేట్స్‌కు ఈ రేసులో చెక్ పెట్టారు.

తొలిసారిగా జెఫ్ బెజోస్...

అమెజాన్ ఇన్‌కార్పొరేషన్ ఫౌండర్, సీఈవో జెఫ్ బెజోస్ 1998లో తొలిసారిగా ఫోర్బ్స్ 400 రిచెస్ట్ అమెరికన్ల జాబితాలో చోటు దక్కించుకున్నారు. అప్పటికి ఒక్క ఏడాది ముందే అంటే.. 1997లో అమెజాన్ ఐపీవోకు వచ్చింది. ఆ తరువాత ఏడాదికే బెజోస్ ప్రపంచ కుబేరుల జాబితాలో చోటు సంపాదించారు. అప్పట్లో ఆయన సంపద 1.6 బిలయన్ డాలర్లు.

పడిపోయిన అమెజాన్ షేర్లు...

అమెజాన్ ఇన్‌కార్పొరేషన్ ఈ ఏడాది మూడో త్రైమాసిక ఫలితాలు ఆశించిన విధంగా రాలేదు. దీంతో అంతర్జాతీయ మార్కెట్‌లో అమెజాన్ షేర్లు క్షీణించాయి. గురువారం ప్రారంభ ట్రేడింగ్‌లోనే ఈ కంపెనీ షేర్లు 9 శాతం మేర పడిపోవడంతో ఒక్కో షేరు ధర 1,624 డాలర్లకు తగ్గిపోయింది. దీంతో అమెజాన్ నికర ఆదాయం ఈ మూడో త్రైమాసికంలో 26 శాతం తగ్గిపోయింది. 2017 తరువాత అమెజాన్ లాభాలు పడిపోవడం ఇదే మొదటిసారి.

నంబర్ వన్ స్థానాన్ని కోల్పోయి...

160 బిలియన్ డాలర్ల సంపదతో 2018లో ప్రపంచ కుబేరుడి కిరీటాన్ని దక్కించుకున్న అమెజాన్ ఫౌండర్, సీఈవో జెఫ్ బెజోస్ ఆ స్థానాన్ని నిలబెట్టుకోలేకపోయారు. ఆయన సంపద 103.9 బిలియన్ డాలర్లకు తగ్గిపోయింది. ఇక రెండో స్థానంలో కొనసాగుతున్న బిల్‌గేట్స్ కూడా ఈ జూలైలో బ్లూమ్‌బర్గ్ బిలియనీర్ ఇండెక్స్ రిపోర్టు ప్రకారం.. బెర్నార్డ్ ఆర్నాల్డ్ ఆ స్థానాన్ని ఆక్రమించుకోవడంతో నంబర్ 3 స్థానానికి పడిపోయారు. కానీ ఏడాది కాలం తరువాత తిరిగి తన నంబర్ వన్ స్థానాన్ని బిల్ గేట్స్ దక్కించుకోగలిగారు. ప్రస్తుతం బిల్ గేట్స్ సంపద 105.7 బిలియన్ డాలర్లు.