రైతు పొలం వద్ద ఎడ్ల బండిని నిలిపితే ఫైన్

ఈ సంఘటన ఉత్తరాఖండ్‌లో శనివారం నాడు చోటు చేసుకుంది. డెహ్రాడూన్‌కు చెందిన ఓ రైతు తన పొలం వద్ద ఎడ్ల బండిని నిలిపి ఉంచాడు. దానిని గమనించిన పోలీసులు ఇసుకను అక్రమంగా తరలిస్తున్నాడని అనుమానించారు. అనంతరం హసన్ ఇంటికి వెళ్లి రూ.1000 జరిమానా విధించారు.

ఎంవీ యాక్ట్ ప్రకారం రూ.1000 జరిమానా

ఎస్సై పంకజ్ కుమార్ నేతృత్వంలోని పోలీస్ టీమ్ ఆ ఏరియాలో ఆ సమయంలో పెట్రోలింగ్ నిర్వహిస్తోంది. అదే సమయంలో డెహ్రాడూన్ ఔట్‌స్కర్ట్‌స్‌లోని తన పొలం సమీపంలో రైతు ఎడ్ల బండిని నిలిపి ఉంచారు. అది ఎవరిదో పోలీసులు తెలుసుకొని, అతనికి జరిమానా విధించారు. అతనికి మోటార్ వెహికిల్ యాక్ట్ సెక్షన్ 81 కింద రూ.1000 జరిమానా విధించారు.

దీనికి చలాన్ విధించడం ఏమిటి?

అయితే, తాను తన పొలం సమీపంలో ఎడ్ల బండి నిలిపి ఉంచానని రైతు చెప్పారు. దీనికి చలాన్ విధించడం ఏమిటని ప్రశ్నించారు. దీనిపై స్థానిక పోలీస్ అధికారి విచారించి, అసలు విషయం తెలుసుకొని, చలాన్ రద్దు చేశారు. ఈ విషయం మీడియాలో వైరల్‌గా మారింది.