నేను బయటివాడిని, నాకు పూర్తిగా తెలియదు: BOE గవర్నర్ పోస్ట్పై రఘురాం రాజన్
సెంట్రల్ బ్యాంక్ గవర్నర్ పదవి పూర్తిగా రాజకీయంగా మారిందని, ఆ పదవి చేపట్టే వారికి ఆ దేశ రాజకీయాల పట్ల కూడా అవగాహన ఉండాలని రిజర్వ్ బ్యాంక్ ఆఫ్ ఇండియా (RBI) మాజీ గవర్నర్ రఘురాం రాజన్ అన్నారు. అలాగే బ్యాంక్ ఆఫ్ ఇంగ్లాండ్ (BOE) గవర్నర్ పదవికి దరఖాస్తు చేసినట్లుగా వచ్చిన వార్తలను ఆయన కొట్టిపారేశారు. ఈ మేరకు ఆయన ఓ ఇంటర్వ్యూ ఇచ్చారు. బ్యాంక్ ఆఫ్ ఇంగ్లాండ్ గవర్నర్ పదవి రేసులో రాజన్ కూడా ఉన్నారని గతంలో వార్తలు వచ్చిన విషయం తెలిసిందే.
లోన్స్ చాలా ఈజీ... ఐటీ రిటర్న్స్ ఫైల్ చేస్తే ప్రయోజనాలెన్నో
మంచి ఉద్యోగంలో ఉన్నాను..
తాను యూనివర్సిటీ ఆఫ్ చికాగోలో మంచి పోస్టులో ఉన్నానని, సెంట్రల్ బ్యాంక్ ప్రొఫెనల్ కంటే విద్యావేత్తగా ఉండటమే తనకు ఇష్టంగా ఉందని రఘురాం రాజన్ వెల్లడించారు. విద్యావేత్తగా తన ఉద్యోగం పట్ల పూర్తి సంతృప్తిగా ఉన్నానని చెప్పారు. ఇది డిప్లమాటిక్ సమాధానం కాదని, తాను నిజమే చెబుతున్నానని అన్నారు. తాను తన ఉద్యోగం పట్ల సంతృప్తిగా ఉన్నానని, ఏ ఉద్యోగం కోసం దరఖాస్తు చేసుకోలేదని చెప్పారు.
లోతైన అవగాహన లేదు
ఇటీవల సెంట్రల్ బ్యాంక్ ఉద్యోగం మరింత రాజకీయంగా మారిందని రఘురాం రాజన్ తెలిపారు. ఈ పదవి కోసం ఆ దేశ రాజకీయాలను, దానిని ఎలా నావిగేట్ చేయాలో అర్థం చేసుకోగలిగి ఉండాలన్నారు. అక్కడి వారు ఎవరిని కోరుకుంటారో వారిని పరిగణలోకి తీసుకుంటారన్నారు. యునైటెడ్ కింగ్ డమ్ పాలిటిక్స్, బ్రెగ్జిట్ అంశంపై అవగాహన గురించి స్పందిస్తూ.. తాను బయటివాడినని (ఆ దేశం వాడిని కాదు), ఆ దేశం రాజకీయాలు, ఇతర అంశాల గురించి తనకు కొద్దిగా తెలుసునని, లోతైన అవగాహన లేదన్నారు. ఇంగ్లాండ్ పైన పూర్తి అవగాహనన ఉన్న వ్యక్తి అయితేనే ఆ పదవిని సమర్థవంతంగా నిర్వహిస్తారన్నారు.
రాజకీయ జోక్యం పెరుగుతోంది
బ్యాంక్ ఆఫ్ ఇంగ్లాండ్ గవర్నర్ మార్క్ క్యార్నీ పదవీ కాలం జనవరితో ముగుస్తోంది. ఆ స్థానంలో రఘురామ్ రాజన్ను నియమించే అవకాశాలు ఉన్నట్లు ఊహాగానాలు వినిపించాయి. బ్రెగ్జిట్ నేపథ్యంలో బ్యాంక్ ఆఫ్ ఇంగ్లాండ్ పైన తీవ్ర రాజకీయపరమైన ఒత్తిళ్లు ఉండే అవకాశముందని, అందుకే ఆ పదవికి తాను దరఖాస్తు చేసుకోలేదన్నారు. పలు దేశాల కేంద్ర బ్యాంకు వ్యవహారాల్లో ఇటీవల రాజకీయ జోక్యం పెరిగిపోతుందన్నారు. ఐరోపా సమాఖ్య నుంచి బ్రిటన్ వైదొలగనున్న నేపథ్యంలో ఆ దేశం తీవ్ర ఆర్థిక ఒడిదొడుకులు ఎదుర్కొనే అవకాశాలు ఉన్నాయని భావిస్తున్నారు. ఈ నేపథ్యంలో అంతర్జాతీయ స్థాయి అనుభవం ఉన్న వ్యక్తిని నియమించాలని బ్రిటన్ భావిస్తోంది. దాని కోసం వేట ప్రారంభించింది. ఇప్పటి వరకు 30మంది అందుకు పోటీ పడుతున్నట్లు సమాచారం.