Bengaluru: కర్ణాటకలో మరో సిలికాన్ వ్యాలీ? ఆ సిటీ బెంగళూరుకి ప్రత్యామ్నాయం అవుతుందా?

సాధారణంగా ఐటీ కంపెనీ లేదా స్టార్టప్ అనగానే మనందరికీ మొదట గుర్తుకొచ్చే నగరం బెంగళూరు (Bengaluru). కానీ, ఇప్పుడు పరిస్థితులు మారుతున్నాయి. కర్ణాటకలో ఐటీ రంగాన్ని కేవలం రాజధాని నగరానికే పరిమితం చేయకుండా, ఇతర పట్టణాలకు కూడా విస్తరించాలనే లక్ష్యంతో 'బియాండ్ బెంగళూరు' (Beyond Bengaluru) అనే వినూత్న కార్యక్రమం మొదలైంది. ఇందులో భాగంగా శివమొగ్గ నగరం.. తదుపరి డిజిటల్ పవర్‌హౌస్‌ గా ఎదిగేందుకు అన్ని అర్హతలు కలిగి ఉందని పారిశ్రామిక వేత్తలు, నిపుణులు ఆశాభావం వ్యక్తం చేస్తున్నారు.

అద్భుతమైన కనెక్టివిటీ, మౌలిక సదుపాయాలు

శివమొగ్గ.. అభివృద్ధిలో కూడా ప్రధాన పాత్ర పోషిస్తున్నది అక్కడి రవాణా సౌకర్యాలు. ఒకప్పుడు కేవలం మూడు రైళ్లు మాత్రమే ఉండే ఈ నగరానికి ఇప్పుడు 21 రైళ్లు నడుస్తున్నాయి. అంతేకాకుండా శివమొగ్గ ఎయిర్‌పోర్ట్‌లో నైట్ ల్యాండింగ్ సౌకర్యం అందుబాటులోకి వస్తే.. ఇది మంగళూరు విమానాశ్రయం కంటే మెరుగైన సేవలందించగలదని ఎమ్మెల్సీ డి.ఎస్. అరుణ్ తెలిపారు. రోడ్డు మార్గం విషయానికి వస్తే.. బెంగళూరు (Bengaluru) - శివమొగ్గ మధ్య ఉన్న రహదారి ఇప్పుడు మైసూర్ ఎక్స్‌ప్రెస్‌వే తరహాలోనే అత్యంత వేగంగా ప్రయాణించేలా అభివృద్ధి చెందింది.

ప్రతిభావంతులైన యువత , ఇంక్యుబేషన్ సెంటర్లు

శివమొగ్గ చుట్టుపక్కల అనేక ఇంజనీరింగ్ కళాశాలలు , విద్యాసంస్థలు ఉండటం వల్ల ఇక్కడ ఐటీ కంపెనీలకు కావాల్సిన మేధోసంపత్తి పుష్కలంగా ఉంది. స్థానిక యువతకు ఉపాధి కల్పించడంతో పాటు, కంపెనీలకు తక్కువ ఖర్చుతో కూడిన ఆఫీస్ స్పేస్ ఇక్కడ లభిస్తుంది. ఇన్ఫోసిస్ ఇన్నోవేషన్ ఫండ్ వంటి సంస్థలు కూడా చిన్న పట్టణాల్లోని స్టార్టప్‌లను ప్రోత్సహించేందుకు ఆసక్తి చూపుతున్నాయి.

బెంగళూరు కంటే ఎక్కువ జీతాలు?

శివమొగ్గలో 2011లోనే ఐటీ కంపెనీని ప్రారంభించిన సురేష్ కుమార్ (Kaleitics వ్యవస్థాపకుడు) ఒక ఆసక్తికరమైన విషయాన్ని పంచుకున్నారు. తమ కంపెనీలో పనిచేసే ఉద్యోగులను ఆకర్షించేందుకు తాము బెంగళూరులో ఇచ్చే జీతాల కంటే ఎక్కువ జీతాలు ఇస్తున్నట్లు ఆయన పేర్కొన్నారు. ప్రస్తుతం ఆయన కంపెనీలో 170 మంది ఉద్యోగులు పనిచేస్తున్నారు , చికాగో వంటి అంతర్జాతీయ నగరాల్లో కూడా కార్యాలయాలు ఉన్నాయి. ప్రారంభంలో ఇంటర్నెట్ , విద్యుత్ సమస్యలు ఉన్నప్పటికీ, ఇప్పుడు శివమొగ్గలో అన్ని వసతులు మెరుగయ్యాయని ఆయన స్పష్టం చేశారు.

చిన్న తరహా పరిశ్రమలకు చేయూత

కర్ణాటక డిజిటల్ ఎకానమీ మిషన్ (KDEM) , FKCCI కలిసి శివమొగ్గ వంటి పట్టణాల్లో ఐటీ, ఎలక్ట్రానిక్స్ , ఇన్నోవేషన్ రంగాలను ప్రోత్సహిస్తున్నాయి. కేవలం భారీ కంపెనీలే కాకుండా, చిన్న తరహా పరిశ్రమలు (MSMEs) కూడా డిజిటల్ టూల్స్‌ను ఉపయోగించుకుని తమ వ్యాపారాలను విస్తరించుకోవాలని FKCCI అధ్యక్షురాలు ఉమా రెడ్డి పిలుపునిచ్చారు. ఉడుపి , మంగళూరు వంటి నగరాల్లో చిన్నగా మొదలైన కంపెనీలు నేడు గ్లోబల్ లెవల్‌కు చేరుకున్నాయని, అదే దారిలో శివమొగ్గ కూడా పయనిస్తుందని నిపుణులు విశ్లేషిస్తున్నారు.

శివమొగ్గ భవిష్యత్తు ఎలా ఉండబోతోంది?

ఏదేమైనా బెంగళూరు నగరంపై పెరుగుతున్న ఒత్తిడిని తగ్గించాలంటే శివమొగ్గ, హాసన్ వంటి పట్టణాలను అభివృద్ధి చేయడం ఏకైక మార్గం. మెరుగైన మౌలిక సదుపాయాలు, విమాన ప్రయాణ సౌకర్యాలు , స్థానికంగా లభించే ప్రతిభ శివమొగ్గను త్వరలోనే ఐటీ హబ్‌గా మార్చబోతున్నాయి. ఇది కేవలం కర్ణాటక ఆర్థిక వ్యవస్థకే కాకుండా, స్థానిక యువతకు వారి సొంత ఊర్లోనే మంచి ఉపాధి అవకాశాలు లభించేలా చేస్తుంది. రానున్న ఐదేళ్లలో శివమొగ్గ ముఖచిత్రం పూర్తిగా మారిపోవడం ఖాయం.