సైకిల్స్ ద్వారా డెలివరీ

తమకు 120 నగరాల్లో 1,70,000 మంది డెలివరీ పార్ట్‌నర్స్ ఉన్నట్లు స్విగ్గీ తెలిపింది. గత మార్చి నెలలో తాము మొత్తం 1.5 మిలియన్ (15 లక్షలు) ఆర్డర్లను సైకిళ్ల పైన సరఫరా చేశామని పేర్కొంది. టూ టైర్‌, త్రీ టైర్‌ నగరాలైన సూరత్‌, బెల్గామ్‌, గౌహతి, లక్నో నగరాల్లో దాదాపు ఇరవై శాతం ఫుడ్‌ ఆర్డర్లను సైకిళ్ల ద్వారానే డెలివరీ చేశామని తెలిపింది. దేశవ్యాప్తంగా 10వేలమంది సైకిల్‌ యజమానులు భాగస్వాములుగా ఉన్నారని, అత్యధికమంది బెంగళూరు, ముంబైలలో ఉన్నారని పేర్కొంది. పర్యావరణ పరిరక్షణలో భాగంగా ఈ దిశగా అడుగులు వేస్తున్నామని తెలిపింది.

బైక్‌ల కంటే సైకిల్ డెలివరీ ఎంతో లాభం

ప్రస్తుతం పదివేల మంది సైకిల్ యజమానులు భాగస్వాములుగా ఉన్నారని, త్వరలో పర్యావరణసహిత డెలివరీని మరిన్ని నగరాలకు విస్తరిస్తామని స్విగ్గీ తెలిపింది. ఆయన మరో ఆసక్తికర విషయం కూడా వెల్లడించారు. కొన్ని నగరాల్లో బైక్‌లపై డెలివరీ చేసేవారికంటే సైకిల్ పైన డెలివరీయే త్వరగా అవుతుందని, బైక్‌ల కంటే వారే త్వరగా డెలివరీ చేస్తున్నారని తెలిపారు. చాలా నగరాల్లో యావరేజ్ టైమ్ తీసుకున్నా బైక్‌ల కంటే సైకిల్ పైన డెలివరీ చేసే సమయమే తక్కువగా ఉందన్నారు. పర్యావరణ పరిరక్షణ దిశగా అడుగులు వేయడంలో స్విగ్గీ ముందుంటుందని తెలిపారు. 2019 చివరి నాటికి 10 ప్రముఖ నగరాల్లో ఎలక్ట్రిక్‌ బైక్‌లపై ఫుడ్‌ డెలివరీ చేసే దిశగా చర్యలు చేపట్టనున్నట్లు తెలిపింది. ఇప్పటికే ఢిల్లీ, లక్నోలలో ఇ-రిక్షాల ద్వారా ఫుడ్‌ను వినియోగదారులకు అందిస్తున్నారు. దీని వల్ల వ్యయ నియంత్రణతో పాటు, పర్యావరణానికి మేలు జరుగుతోందని చెబుతోంది.

జొమాటోది అదే దారి

కాగా, మరో ఫుడ్ డెలివరీ యాప్ జొమాటో కూడా ఫిబ్రవరి నుంచి సైకిళ్ల పైన సరఫరా చేస్తోంది. తమకు 5వేల మంది డెలివరీ పార్ట్‌నర్స్ ఉన్నట్లు పేర్కొంది. మొబిసై, యులు, జూమ్‌కార్‌కు చెందిన పెడల్‌లతో ఒప్పందం చేసుకుంది. బైక్స్ కంటే సైకిల్ పైన డెలివరీయే ఖర్చు తక్కువ అని, పైగా లైసెన్స్ అవసరం లేదని జొమాటో అప్పుడు పేర్కొంది. అంతేకాదు, జొమాటో సైకిల్ డెలివరీ బాయ్స్‌కు ప్రత్యేక డెలివరీ బ్యాగ్స్‌ను కూడా తయారు చేసింది. ఆలస్యం లేకుండా 2.5 కిలోమీటర్ల వరకు సరైన సమయంలో డెలివరీ చేసినట్లు పేర్కొంది.