న్యూఢిల్లీ: ఉద్యోగు భవిష్యనిధి (ఈపీఎఫ్ఓ) వడ్డీ రేటును కేంద్ర ఆర్థిక మంత్రిత్వశాఖ నిర్ధారించింది. వడ్డీ రేటు మొత్తాన్ని 8.65 శాతం మేర నిర్ణయించింది. దీనికి సంబంధించిన ప్రతిపాదనలపై ఆర్థిక శాఖ అధికారులు ఆమోదముద్ర వేశారు. ఇదివరకు ఈ సంఖ్య 8.55 శాతంగా ఉండేది. దీన్ని సవరించింది కేంద్రం.

2018-19 ఆర్థిక సంవత్సరానికి ఈ వడ్డీ రేటు వర్తిస్తుంది. దేశవ్యాప్తంగా సంఘటిత రంగంలో సుమారు ఆరు కోట్ల మంది ఉద్యోగులు పనిచేస్తున్నారు. వారందరికీ తాజాగా సవరించిన వడ్డీ రేటు శాతం వర్తిస్తుందని ఆర్థికశాఖ అధికారులు తెలిపారు.

భవిష్యనిధిలో డబ్బులను జమ చేసుకున్న ఉద్యోగులందరికీ ప్రస్తుత ఆర్థిక సంవత్సరంలో 8.65 శాతం వడ్డీ రేటును ప్రకటించాలని ఎంప్లాయీస్ ప్రావిడెంట్ ఫండ్ ఆర్గనైజేషన్ నిర్ణయం తీసుకుంది. దీనికి సంబంధించిన ప్రతిపాదనలను ఆర్థిక శాఖకు అందజేసింది. తాజాగా ఈ ప్రతిపాదనలపై ఆమోదముద్ర పడింది.

నిజానికి- మూడేళ్లుగా భవిష్యనిధి ఖాతాలపై వడ్డీ రేటులో ఎలాంటి మార్పూ రాలేదు. ఆర్థిక మంత్రిత్వశాఖ వాటిని సవరించలేదు. 8.55 శాతం వడ్డీ రేటును నాలుగేళ్ల పాటు కొనసాగించారు. వడ్డీ రేటు మొత్తాన్ని పెంచాలంటూ ఈ ఏడాది ఫిబ్రవరిలో ఈపీఎఫ్ఓ నిర్ణయం తీసుకుంది. దీనికి తాజాగా ఆర్థికమంత్రిత్వ శాఖ ఆమోదం తెలియజేసింది.