కరోనా నుండి కోలుకుంటే ఇన్సురెన్స్ అప్పుడే కష్టం! ఇచ్చినా అధిక ప్రీమియం

కరోనా మహమ్మారి నుండి మీరు కోలుకున్నారా? వాస్తవానికి కరోనా దీర్ఘకాల రోగం కిందకు రాదు. కానీ దీర్ఘకాల రోగుల బీమా కంటే కరోనా నుండి కోలుకున్న బాధితులు ఇక నుండి ఆరోగ్య లేదా జీవిత బీమా పొందటం అంత ఈజీ కాదు! కరోనా ఏడాదిన్నర కాలంగా ప్రపంచాన్ని అతలాకుతలం చేస్తోంది. కొత్త వేరియెంట్లతో భయాన్ని కలిగిస్తోంది. ఎంతోమంది ప్రాణాలను తీసుకు వెళ్తోంది. ఆర్థికంగా కూడా కోట్లాదిమంది చితికిపోతున్నారు. కరోనా నేపథ్యంలో భారీగా క్లెయిమ్స్ వస్తుండటంతో ఇన్సురెన్స్ కంపెనీలు ఎన్నో దారులు వెతుకుతున్నాయి.

కొద్ది నెలలు ఆగాల్సిందే

కరోనా బారినపడి కోలుకున్న వారు ఎవరైనా ఆ తర్వాత వెంటనే లైఫ్ ఇన్సురెన్స్ పాలసీని లేదా ఆరోగ్య బీమా పాలసీని తీసుకోవాలని భావిస్తే అది సాధ్యం కాకపోవచ్చు. కరోనాపై గెలిచిన వారికి ఇన్సూరెన్స్ పాలసీలు ఇచ్చే ముందు చాలా కఠినమైన అండర్ రైటింగ్ నిబంధనలను తెచ్చాయి. కరోనా నుండి కోలుకున్న తర్వాత కనీసం 6 నెలల దాకా ఏ పాలసీ తీసుకునే అవకాశం కనిపించడం లేదు.

కరోనా బారినపడి కోలుకున్న వారి దీర్ఘకాలిక ఆరోగ్యస్థితిగతులపై ఎలాంటి అంచనా లేదు. ఒక్కో కంపెనీ ఒక్కో రకమైన పాలసీలు ఇస్తున్నాయి. కొన్ని కంపెనీలు 3 నెలల తర్వాత, కొన్ని సంస్థలు 6 నెలల తర్వాత కానీ పాలసీ ఇవ్వడానికి ముందుకు రావట్లేదు.

డిశ్చార్జ్ సమ్మరీ సహా డాక్యుమెంట్స్

కరోనా నుండి బయటపడిన వారు ఆరోగ్య బీమాను తీసుకోవాలంటే కచ్చితంగా పూర్తి వివరాలు తెలియజేయాలి. డిశ్చార్జ్ సమ్మరీతో సహా కరోనా గురించి సంబంధించిన అన్ని డాక్యుమెంట్స్ సమర్పించాలి. బీమా కోసం దరఖాస్తు చేసుకున్న తర్వాత అండర్ రైటింగ్ టీమ్ మీ వద్దకు వచ్చి మరిన్ని వివరాలు సేకరిస్తారు. మీ హెల్త్ రికార్డ్స్‌ను బట్టి మీకు ఆరోగ్య బీమాను ఇవ్వాలా లేదా అనేది తేలుస్తారు. బీమా ఇవ్వడాన్ని వాయిదా కూడా వేయవచ్చు. అంతేకాదు మెడికల్ టెస్టులు కూడా చేస్తాయి.

కరోనాతో పాటు వయస్సు, బీమా తీసుకునే మొత్తం, అప్పటికే ఉన్న జబ్బుల వంి కారణాలతో కూడిన మెడికల్ టెస్టులు తప్పనిసరి. కరోనా నుండి కోలుకున్న వారికి అదనపు టెస్టులు ఉండవచ్చు. ప్రస్తుతానికి ఆరు నెలలు అని చెబుతున్నప్పటికీ, ఊపిరితిత్తులు, గుండె వంటి వాటిపై కరోనా ప్రభావం పడవచ్చునని బీమా కంపెనీలు భావిస్తున్నాయి.

అధిక ప్రీమియం

జీవిత బీమా పాలసీలు దీర్ఘకాలానికి చెందినవి. దీంతో జీవిత బీమా కంపెనీలు మరిన్ని కఠినమైన నియమాలతో ఉంటాయి. లైఫ్ ఇన్సురెన్స్ కంపెనీలు పాలసీ ఇచ్చే ముందు ఆరు నెలల గడువును పరిగణలోకి తీసుకోవడం లేదు. అంతేకాదు, ఇవ్వవలసి వస్తే అధిక ప్రీమియంను వసూలు చేస్తున్నాయి. మరికొన్ని కంపెనీలు బీమా ఇచ్చేందుకు వెనుకాడుతున్నాయి. ఇంకొన్ని కంపెనీలు అధిక ప్రీమియం వసూలు చేస్తున్నాయి.