COVID 19: వాయిదా పద్ధతిలో ఆరోగ్య బీమా చెల్లింపుకు అవకాశం
ఆరోగ్య బీమా ప్రీమియంను వాయిదా పద్ధతుల్లో వసూలు చేసుకోవడానికి బీమా సంస్థలకు భారతీయ నియంత్రణ, అభివృద్ధి ప్రాధికార సంస్థ (IRDAI) అనుమతి ఇచ్చింది. కరోనా వ్యాప్తిని అరికట్టేందుకు దేశవ్యాప్తంగా లాక్ డౌన్ కొనసాగుతోన్న విషయం తెలిసిందే. జనజీవనం అంతా స్తంభించడంతో ఆర్థిక కార్యకలాపాలపై తీవ్ర ప్రభావం కనిపిస్తోంది. దీంతో ఈ నిర్ణయం తీసుకోవాల్సి వచ్చింది.
లాక్ డౌన్ సమయంలో ఆరోగ్య బీమా ప్రీమియం పాలసీదారులకు ఇది ఊరటను కలిగించే విషయం. ప్రస్తుతం ఎంతోమందికి ఆదాయం లేకపోవడం లేదా తగ్గిన పరిస్థితుల్లో వాయిదా పద్ధతిలో ఆరోగ్య బీమా చెల్లింపులను స్వీకరించే విధంగా బీమా కంపెనీలకు వెసులుబాటు కలిగించడం గమనార్హం. నెలా, త్రైమాసికం, ఆరు నెలల చెల్లింపులకు అవకాశం కల్పించే విషయంలో తుది నిర్ణయం తీసుకోవాలని సూచించింది.
వాలంటరీ అడ్మినిస్ట్రేషన్కు ఎయిర్లైన్స్, ప్రమాదంలో 16,000 ఉద్యోగాలు
పాలసీ ప్రీమియం, ప్రోడక్ట్ ఆధారంగా బీమా కంపెనీలు ఈ నిర్ణయం తీసుకోవలసి ఉంటుందని సూచించింది. ధ్రవీకరణ ప్రాతిపదికన, వ్యక్తిగత ఆరోగ్య బీమా ఉత్పత్తుల్లో ప్రీమియం చెల్లింపు ఆప్షన్లను జోడించేందుకు బీమా సంస్థలకు గత ఏడాది సెప్టెంబర్ నెలలోనే IRDAI అనుమతి ఇచ్చింది. ఇప్పుడు కరోనా నేపథ్యంలో ఆరోగ్య బీమా ప్రీమియం మొత్తాన్ని ప్రజలు సులభంగా చెల్లించేందుకు వీలుగా బీమా సంస్థలు వాయిదా పద్ధతుల్లో ప్రీమియం వసూలు చేసుకోవచ్చు.