Credit card EMI: క్రెడిట్ కార్డ్ బిల్లును EMI గా మార్చడం లాభమా? నష్టమా?

క్రెడిట్ కార్డ్ స్టేట్‌మెంట్ ఓపెన్ చేయగానే భారీ మొత్తంలో బిల్లు చూసి కంగారు పడుతుంటారు చాలామంది. అప్పుడే సరిగ్గా బ్యాంక్ నుంచి మీకు ఒక ఆఫర్ వస్తుంది.. "మీ బిల్లును సులభమైన నెలవారీ వాయిదాలుగా (EMI) మార్చుకోండి" అని. ఇది వినడానికి చాలా బాగుంటుంది. అయితే ఆ బటన్ నొక్కే ముందు మీరు కొన్ని ముఖ్యమైన విషయాలు తెలుసుకోవాలి. క్రెడిట్ కార్డ్ ఈఎంఐ (credit card EMI) అనేది ఒక సౌకర్యమా లేక భారమా? ఈ నిర్ణయం మీ జేబుపై ఎలాంటి ప్రభావం చూపుతుందో ఇప్పుడు తెలుసుకుందాం..

క్రెడిట్ కార్డ్ వాడుతున్నప్పుడు ఒక్కోసారి అనుకోని ఖర్చులు రావచ్చు. హాస్పిటల్ బిల్లులు, చివరి నిమిషంలో విమాన ప్రయాణాలు లేదా పండుగ షాపింగ్ వల్ల బిల్లు మన అంచనాలను మించిపోతుంది. ఆ సమయంలో మొత్తం డబ్బు ఒకేసారి కట్టలేక చాలా మంది 'కన్వర్ట్ టు EMI' (Convert to EMI) ఆప్షన్‌ను ఎంచుకుంటారు. అయితే ఇది మీకు నిజంగా మేలు చేస్తుందా లేదా అనేది మీరు లెక్కించే వడ్డీపై ఆధారపడి ఉంటుంది.

బ్యాంకులు EMI ఆఫర్ ఎందుకు ఇస్తాయి?

రూ. 90,000 బిల్లు కట్టడం కష్టం అని బ్యాంకులకు తెలుసు. అందుకే ఆ మొత్తాన్ని రూ. 8,000 లేదా రూ. 9,000 నెలవారీ వాయిదాలుగా చూపిస్తాయి. అప్పుడు మనకు ఆ భారం తక్కువగా అనిపిస్తుంది. కానీ గుర్తుంచుకోండి.. బ్యాంక్ ఇది ఉచితంగా చేయదు. దీనిని ఒక స్వల్పకాలిక లోన్‌గా పరిగణిస్తారు. దీనిపై వడ్డీతో పాటు 'ప్రాసెసింగ్ ఫీజు' కూడా వసూలు చేస్తారు. మీరు విడతల వారీగా కట్టే మొత్తం అసలు బిల్లు కంటే ఎప్పుడూ ఎక్కువే ఉంటుంది.

ఎప్పుడు EMI గా మార్చుకోవడం మంచిది?

కొన్నిసార్లు EMI ఆప్షన్ నిజంగానే ప్రాణదాతగా మారుతుంది. మీ దగ్గర నగదు నిల్వలు తక్కువగా ఉన్నప్పుడు, ఆ బిల్లు కట్టకపోతే 35% నుండి 40% వరకు పడే భారీ వడ్డీ (Interest on revolving credit) నుంచి తప్పించుకోవడానికి Credit card EMI ఒక మంచి మార్గం. ఇది మీ అప్పును ఒక పద్ధతి ప్రకారం తీర్చడానికి సహాయపడుతుంది. బిల్లు కట్టకుండా అలాగే ఉంచే కంటే తక్కువ వడ్డీతో EMIగా మార్చుకోవడం ఎప్పుడూ మేలే.

చాలా మంది గమనించని నష్టాలు ఇవే!

• క్రెడిట్ లిమిట్ బ్లాక్ అవుతుంది: మీరు రూ. 80,000 బిల్లును EMIగా మారిస్తే, మీ కార్డుపై ఉన్న లిమిట్‌లో ఆ మొత్తం బ్లాక్ అయిపోతుంది. మీరు వాయిదాలు కడుతున్న కొద్దీ లిమిట్ పెరుగుతుంది తప్ప, ఒకేసారి రాదు.
• మొత్తం ఖర్చు పెరుగుతుంది: మనం నెలకు తక్కువ కడుతున్నాం కదా అని అనుకుంటాం. కానీ 12 నెలల తర్వాత చూస్తే, మీరు రూ. 90,000 వస్తువుకు దాదాపు రూ. 96,000 లేదా రూ. 98,000 వరకు చెల్లించి ఉంటారు. ఆ అదనపు మొత్తమే మీరు పొందిన సౌకర్యానికి చెల్లించే ధర.
• అలవాటుగా మారే ప్రమాదం: ఒకసారి EMIకి అలవాటు పడితే, అవసరం లేకున్నా పెద్ద పెద్ద వస్తువులు కొనే అవకాశం ఉంటుంది. ఇది మిమ్మల్ని అప్పుల ఊబిలోకి నెట్టేస్తుంది.

క్రెడిట్ కార్డు ఈఎంఐ (Credit card EMI) అనేది ఒక ట్రాప్ కాదు, కానీ దానిని అలవాటుగా మార్చుకోకూడదు. మీ దగ్గర డబ్బు ఉండి, బిల్లు కట్టగలిగే పరిస్థితి ఉంటే, వెంటనే చెల్లించడమే అత్యుత్తమ నిర్ణయం. కేవలం అనివార్య పరిస్థితుల్లో , నగదు కొరత ఉన్నప్పుడు మాత్రమే ఈ ఆప్షన్ ఎంచుకోండి. నిర్ణయం తీసుకునే ముందు వడ్డీ రేటు , ప్రాసెసింగ్ ఫీజులను సరిచూసుకోవడం మర్చిపోవద్దు.