భారీ నష్టాల్లో స్టాక్ మార్కెట్లు, సెన్సెక్స్ 300 పాయింట్లు డౌన్

ముంబై: స్టాక్ మార్కెట్లు మంగళవారం (మే 11) భారీ నష్టాల్లో ట్రేడింగ్ ప్రారంభించాయి. ఉదయం ఓ సమయంలో సెన్సెక్స్ 450 పాయింట్ల వరకు వరకు నష్టపోయింది. నిఫ్టీ కూడా 150 పాయింట్లకు పైగా క్షీణించింది. ఆ తర్వాత కాస్త కోలుకున్నట్లుగా కనిపించినప్పటికీ నష్టాల్లోనే ఉంది. అమెరికా మార్కెట్లు సోమవారం నష్టాల్లో ముగిశాయి. ఆసియా మార్కెట్లు అప్రమత్తంగా కదులుతున్నాయి. దీనికి తోడు కరోనా భయాలు ఇన్వెస్టర్లకు ఆందోళన కలిగిస్తున్నాయి. కీలక రంగాల షేర్లు నష్టపోయాయి.

కరోనా కేసులు ఇలాగే పెరుగుతుంటే భారత వృద్ధి రేటు 8.2 శాతానికి పడిపోవచ్చని ఫిచ్ రేటింగ్స్ అంచనా వేసింది. దీనికి తోడు నాలుగు రోజుల లాభాల నేపథ్యంలో ఇన్వెస్టర్లు ప్రాఫిట్ బుకింగ్‌కు మొగ్గు చూపారు. దీంతో సూచీలు నష్టాల్లో ఉన్నాయి.

భారీ నష్టాల్లో మార్కెట్లు

సెన్సెక్స్ నేడు ఉదయం 49,066.45 పాయింట్ల వద్ద ప్రారంభమై, 49,304.47 పాయింట్ల వద్ద గరిష్టాన్ని, 48,988.18 పాయింట్ల వద్ద కనిష్టాన్ని తాకింది. మధ్యాహ్నం గం.12.50 సమయానికి సెన్సెక్స్ 330.95 (0.67%) పాయింట్ల మేర నష్టపోయి 49,171.46 పాయింట్ల వద్ద ట్రేడ్ అయింది. నిఫ్టీ అదే సమయానికి 85.95 (0.58%) పాయింట్లు క్షీణించి 14,856.40 పాయింట్ల వద్ద ట్రేడ్ అయింది. నిఫ్టీ 14,789.70 పాయింట్ల వద్ద ప్రారంభమై, 14,900.00 పాయింట్ల వద్ద గరిష్టాన్ని, 14,771.40 పాయింట్ల వద్ద కనిష్టాన్ని తాకింది.

టాప్ లూజర్స్, గెయినర్స్

నేటి మధ్యాహ్నం 1 గంటల సమయానికి టాప్ గెయినర్స్ జాబితాలో కోల్ ఇండియా 4.32 శాతం, IOC 4.14 శాతం, అల్ట్రా టెక్ సిమెంట్ 2.55 శాతం, ఎన్టీపీసీ 1.86 శాతం, టాటా కన్స్యూమర్ ప్రోడక్ట్స్ 1.71 శాతం లాభపడ్డాయి.

టాప్ లూజర్స్ జాబితాలో HDFC 2.54 శాతం, హిండాల్కో 2.48 శాతం, కొటక్ మహీంద్రా బ్యాంకు 2.09 శాతం, JSW స్టీల్ 1.82 శాతం, విప్రో 1.77 శాతం నష్టపోయాయి.

మోస్ట్ యాక్టివ్ స్టాక్స్‌లో టాటా స్టీల్, టాటా మోటార్స్, ఎస్బీఐ, హిండాల్కో, సన్ ఫార్మా ఉన్నాయి.

రంగాలవారీగా...

నిఫ్టీ 50 స్టాక్స్ 0.57 శాతం నష్టపోగా, నిఫ్టీ మిడ్ క్యాప్ 0.41 లాభపడ్డాయి. నిఫ్టీ ఆటో 0.27 శాతం, నిఫ్టీ ఎనర్జీ 0.84 శాతం, నిఫ్టీ మీడియా 0.81 శాతం, నిఫ్టీ పీఎస్‌యూ బ్యాంకు 0.29 శాతం, నిఫ్టీ రియాల్టీ 0.27 శాతం లాభపడ్డాయి. నిఫ్టీ బ్యాంకు 0.63 శాతం, నిఫ్టీ ఫైనాన్షియల్ సర్వీసెస్ 1.09 శాతం, నిఫ్టీ ఎఫ్ఎంసీజీ 0.24 శాతం, నిఫ్టీ ఐటీ 0.97 శాతం, నిఫ్టీ మెటల్ 0.72 శాతం, నిఫ్టీ ఫార్మా 0.67 శాతం, నిఫ్టీ ప్రయివేటు బ్యాంకు 0.70 శాతం నష్టపోయాయి.