Bengaluru: బెంగళూరులో 9-5 షెడ్యూల్ అంటే ఇదే.. సోషల్ మీడియాలో టెక్కీ షేర్ చేసిన రియాలిటీ!

మెట్రో నగరాల్లో నివసించడం అనేది ఒక కొత్తరకమైన అనుభవం. అవకాశాలు ఎంత ఎక్కువగా ఉంటాయో.. అలసట, ఒత్తిడి కూడా అంతే స్థాయిలో ఉంటాయి. ముఖ్యంగా బెంగళూరు (Bengaluru) లో ఒక సాఫ్ట్‌వేర్ ఇంజనీర్ జీవితం ఎలా ఉంటుందో వివరిస్తూ ఒక సీనియర్ టెక్కీ ఎక్స్‌ (X) లో చేసిన పోస్ట్ ఇప్పుడు నెటిజన్ల మనసు గెలుచుకుంటోంది. ఆఫీసులో కేవలం రెండు గంటల పాటు ఎటువంటి ఆటంకం లేకుండా ప్రశాంతంగా పని చేసుకోవడానికి తను రోజంతా ఎంతగా పోరాడాల్సి వస్తుందో ఆయన చాలా బాధతో వివరించారు. ఈ పోస్ట్ చదివిన ప్రతి ఐటీ ఉద్యోగి ఇది నా కథే అని ఫీల్ అవుతున్నారు.

ఫిల్టర్ కాఫీ నుంచి ఆఫీస్ ప్రయాణం వరకు

ఆ టెక్కీ కథనం ప్రకారం.. ఆయన రోజు ఉదయం 7:30 గంటలకు ఒక కప్పు వేడి వేడి ఫిల్టర్ కాఫీతో మొదలవుతుంది. ఆ కాఫీ ఇచ్చే ఉత్సాహంతో వెంటనే ఆఫీస్ మెసేజ్‌ లు, వర్క్ అప్‌డేట్స్ చెక్ చేసుకోవడం ఆయనకు నిత్యకృత్యం. సరిగ్గా 8:30 గంటలకల్లా ఇంటి నుండి ఆఫీసుకు బయలుదేరాలి. ఎందుకంటే కొంచెం ఆలస్యమైనా బెంగళూరులోని భయంకరమైన ట్రాఫిక్‌ లో సుమారు రెండు గంటల పాటు చిక్కుకుపోవాల్సి వస్తుంది. ఉదయం 9:30 గంటలకు టీమ్ స్టాండప్ మీటింగ్‌ తో పని అధికారికంగా మొదలవుతుంది. అక్కడ చర్చలన్నీ వేరే టీమ్స్ నుండి రావాల్సిన 'డిపెండెన్సీ'ల చుట్టూనే తిరుగుతాయని ఆయన సరదాగా పేర్కొన్నారు.

ఏకాగ్రత కోసం నిరంతర యుద్ధం

అసలు పని మీద దృష్టి పెట్టాలంటే ఉదయం 11 గంటల వరకు వేచి చూడాలి. ఆ సమయంలో కూడా వందలాది వాట్సాప్ గ్రూపుల నోటిఫికేషన్లను మ్యూట్ చేస్తే తప్ప ప్రశాంతంగా పని చేసుకోవడం సాధ్యం కాదట. ఇక మధ్యాహ్నం 1 గంటకు లంచ్ బ్రేక్ అంటే టీమ్ అంతా కలిసి బయటకు వెళ్లడం ఒక టాస్క్. అక్కడ ఏం తినాలి అని చర్చించడానికే సగం సమయం అయిపోతుంది. సాయంత్రం 3 గంటలకు మొదలయ్యే మీటింగ్‌ లు, కాల్స్ అసలు ప్రొడక్టివిటీని దెబ్బతీస్తాయని, నిజానికి వీటిని ఒక చిన్న ఈమెయిల్ లేదా డాక్యుమెంట్ ద్వారా కూడా ముగించవచ్చని ఆయన అభిప్రాయపడ్డారు.

రాత్రి 11:30 గంటల వరకు పని ఒత్తిడి

సాయంత్రం 6 గంటలకు ఎలాగోలా టైమ్ చూసుకుని జిమ్‌కు వెళ్లడం లేదా కాసేపు నడవడం ఆయన అలవాటు. రాత్రి 8:30 గంటలకు డిన్నర్ ప్లాన్ చేయడం.. ఇది కూడా ఫుడ్ డెలివరీ యాప్‌లలో ఏం ఆర్డర్ చేయాలి అనే సందిగ్ధంతోనే గడిచిపోతుంది. చివరకు రాత్రి 11:30 గంటలకు మరోసారి కోడ్ రివ్యూ చేసి, ఏదైనా ఎమర్జెన్సీ వస్తుందేమో అని లాప్‌టాప్‌ను పక్కనే పెట్టుకుని పడుకోవాల్సిన పరిస్థితి. బెంగళూరు నగరం మనకు నేర్పే అతిపెద్ద పాఠం ఏంటంటే.. రోజులో కనీసం రెండు గంటల పాటు మన పనులపై మనకు పూర్తి ఏకాగ్రత ఉండాలి, లేదంటే ఆ సమయాన్ని ఈ నగరం తన ట్రాఫిక్ , అనవసరపు మీటింగ్‌లతో తినేస్తుందని ఆయన ఆవేదన వ్యక్తం చేశారు.