SBI తర్వాత వడ్డీ రేట్లు భారీగా తగ్గించిన బ్యాంక్ ఆఫ్ ఇండియా

SBI వడ్డీ రేటు తగ్గింపు

ఆర్బీఐ వడ్డీ రేట్లు తగ్గించిన కొన్ని గంటల్లోనే ఎస్బీఐ వడ్డీ రేట్లను 75 బేసిస్ పాయింట్లు తగ్గించింది. ఈ వడ్డీ రేట్లు ఏప్రిల్ 1వ తేదీ నుంచి అమల్లోకి వస్తాయని ప్రకటనలో తెలిపింది. దీంతో పాటు రిటైల్, బల్క్ డిపాజిట్లపై వడ్డీ రేట్లను కూడా 20 బేసిస్ పాయింట్ల నుండి 100 బేసిస్ పాయింట్ల వరకు తగ్గించింది.

తగ్గింపు ఇలా..

ఎస్బీఐ ఈ నిర్ణయంతో ఎక్స్‌టర్నల్ బెంచ్‌మార్క్ లింక్డ్ లెండింగ్ రేటు (EBR), రెపో లింక్డ్ లెండింగ్ రేటుతో (RLR) అనుసంధానమై అన్ని రకాల రుణాలపై వడ్డీరేటు మరింత తగ్గనుంది. దీంతో EBR రేటు 7.80% నుంచి 7.05% తగ్గనుండగా, RLR 7.40% నుంచి 6.65% దిగిరానుంది. బ్యాంకు తీసుకున్న తాజా నిర్ణయంతో 30 ఏళ్ల కాలపరిమితి కలిగిన లక్ష రూపాయల రుణంపై ఈఎంఐ రూ.52 తగ్గనుంది.

75 బేసిస్ పాయింట్లు తగ్గించిన BOI

బ్యాంక్ ఆఫ్ ఇండియా రుణ రేట్లను తగ్గించనుంది. ఎక్స్టర్నల్ బెంచ్ మార్క్‌కు అనుసంధానమైన రుణ రేట్లను 75 బేసిస్ పాయింట్లు తగ్గించింది. దీంతో కొత్త రుణ రేటు 7.25 శాతానికి దిగి వస్తుంది. ఏప్రిల్ 1వ తేదీ నుండి ఇది అమల్లోకి వస్తుంది. బ్యాంకు ఎక్స్టర్నల్ బెంచ్ మార్క్ రుణ రేట్, ఆర్బీఐ రెపో రేటుకు అనుసంధానమై ఉంది.

లాభం చేకూరుతుంది.. BOI

'ఎక్స్టర్నల్ బెంచ్ మార్క్ లెండింగ్ రేటును 75 బేసిస్ పాయింట్లు తగ్గించి వార్షిక రేటును 7.25 శాతానికి తీసుకొచ్చాం. దీనివల్ల రిజర్వ్ బ్యాంక్ ఇటీవల తగ్గించిన రెపో రేటు ప్రయోజనాన్ని ఖాతాదారులకు యథాతథంగా ఇస్తున్నాం. మా గృహ, వాహన రుణ గ్రహీతలతోపాటు, సూక్ష్మ, చిన్న, మధ్యతరహా కస్టమర్లకు లాభం చేకూరగలదు' అని బ్యాంక్ ఆఫ్ ఇండియా ఓ ప్రకటనలో తెలిపింది. బెంచ్ మార్క్ మార్జినల్ కాస్ట్ ఆఫ్ ఫండ్స్ (MCLR) రేటును కూడా బ్యాంకు 25 బేసిస్ పాయింట్ల వరకు కోత విధించింది. ఏడాది నుండి నెల రోజుల కాల వ్యవధిపై ఈ తగ్గింపు వర్తిస్తుంది. ఏడాది MCLR ప్రస్తుతం 7.95% ఉంది.