పండుగకు ముందు తగ్గుతున్న బంగారం ధరలు, భారీగా పెరిగి స్వల్ప తగ్గుదల

బంగారం ధరలు స్వల్పంగా క్షీణించాయి. గతవారం రూ.800 వరకు పెరిగిన పసిడి ధరలు ఈ వారం తగ్గుదలతో ప్రారంభమయ్యాయి. నేడు (సోమవారం, అక్టోబర్ 11) ప్రారంభ సెషన్‌లో డిసెంబర్ గోల్డ్ ఫ్యూచర్స్ రూ.122.00 (-0.26%) తగ్గి రూ.46915.00 వద్ద, ఫిబ్రవరి గోల్డ్ ఫ్యూచర్స్ రూ.121.00 (-0.26%) క్షీణించి రూ.47090.00 వద్ద ట్రేడ్ అయింది. డిసెంబర్ గోల్డ్ ఫ్యూచర్స్ గతవారం రూ.47,000 దాటింది. ఈ వారం అతి స్వల్ప తగ్గుదలతో లేదా స్థిరంగా ప్రారంభమైంది. అయినప్పటికీ గోల్డ్ ఫ్యూచర్స్ రూ.47,000 సమీపంలోనే ఉంది. సిల్వర్ ఫ్యూచర్స్ రూ.62,000 మరింత చేరువైంది. నేడు అతి స్వల్పంగా రూ.42 పెరిగింది. దీంతో డిసెంబర్ సిల్వర్ ఫ్యూచర్స్ ప్రారంభ సెషన్లో రూ.61843.00 వద్ద ట్రేడ్ అయింది. మార్చి సిల్వర్ ఫ్యూచర్స్ రూ.62271.00 వద్ద ట్రేడ్ అయింది. బంగారం ఆల్ టైమ్ గరిష్టంతో రూ.9300 తక్కువగా ఉంది. పండుగకు ముందు పసిడి ధరలు కాస్త తగ్గడం కొద్దిగా ఊరట.

అంతర్జాతీయ మార్కెట్ కామెక్స్‌లో గోల్డ్ ఫ్యూచర్స్ నేడు స్వల్పంగా క్షీణించింది. గోల్డ్ ఫ్యూచర్స్ 1757 డాలర్ల దిగువకు పడిపోయింది. గోల్డ్ ఫ్యూచర్స్ 1.65 (-0.09%) డాలర్లు క్షీణించి 1,755.75 డాలర్ల వద్ద, సిల్వర్ ఫ్యూచర్స్ 0.013 (+0.06%) డాలర్లు ఎగిసి 22.712 డాలర్ల వద్ద ట్రేడ్ అయింది. నేటి సెషన్‌లో 1,751.20 - 1,761.10 డాలర్ల మధ్య ట్రేడ్ అయింది. 52 వారాల గరిష్టం 1978.40 డాలర్లు కాగా, 52 వారాల కనిష్టం 1677.90 డాలర్లు. క్రితం సెషన్‌లో 1757.40 డాలర్ల వద్ద ముగిసింది. బంగారం ధర ఒక ఏడాదిలో దాదాపు పది శాతం క్షీణించింది.

డిసెంబర్ గోల్డ్ ఫ్యూచర్స్ ఈ వారం రూ.47,000 దిగువకు వస్తే మరింత క్షీణించే అవకాశముందని, రూ.46,450 మద్దతు లభించవచ్చునని బులియన్ మార్కెట్ నిపుణులు అభిప్రాయపడుతున్నారు. మరింత క్షీణిస్తే రూ.46,000 దిగువకు పడిపోవచ్చునని చెబుతున్నారు. అలాకాకుండా రూ.47,500 పైకి చేరుకుంటే రూ.47,500కు చేరుకోవచ్చునని, దానిని కూడా అధిగమిస్తే రూ.47,950 దిశగా వెళ్ళవచ్చునని చెబుతున్నారు. రూ.46,550 వద్ద స్టాప్ లాస్ పెట్టుకొని, రూ.46,670 వద్ద కొనుగోలు చేయవచ్చునని సూచిస్తున్నారు.