కాక్‌టెయిల్ థెరపీ క్లెయిమ్స్‌ను తిరస్కరించవద్దు: Irdai ఆదేశాలు

కరోనా చికిత్సలో భాగంగా యాంటీ బాడీ కాక్ టెయిల్ థెరపీకి ఆరోగ్య బీమా వర్తిస్తుందని ఇన్సురెన్స్ రెగ్యులేటర్ ఇన్సురెన్స్ రెగ్యులేటరీ అండ్ డెవలప్‌మెంట్ అథారిటీ ఆఫ్ ఇండియా(Irdai) బీమా సంస్థలకు స్పష్టే చేసింది. బీమా సంస్థలు ఈ చికిత్సను ప్రయోగాత్మకంగా పేర్కొంటూ, క్లెయిమ్స్‌ను తిరస్కరించకూడదని సూచించింది. ఈ చికిత్స తీసుకున్న వారికి క్లెయిమ్ ఇవ్వడం లేదని లేదా ఆ చికిత్స ఖర్చును మినహాయించి మిగతా మొత్తం చెల్లిస్తున్నారని ఇటీవలి కాలంలో నియంత్రణ సంస్థకు ఫిర్యాదులు వచ్చాయి.

ఈ నేపథ్యంలో Irdai సాధారణ, ఆరోగ్య బీమా సంస్థల సీఎండీ, సీఈవోలకు ఒక సర్క్యులర్‌ను జారీ చేసింది. యాంటీ బాడీ కాక్ టెయిల్ చికిత్సకు సీడీఎస్‌సీవో అత్యవసర వినియోగం కోసం అనుమతిచ్చిందని, ఈ నేపథ్యంలో క్లెయిమ్స్‌ను తిరస్కరించకూడదని తెలిపింది. నిబంధనల ప్రకారం క్లెయిమ్స్ పరిష్కారం జరిగేందుకు వీలుగా తగిన ఏర్పాట్లు చేసుకోవాలని సూచించింది.

కోవిడ్-19 యాంటీ బాడీ కాక్ టెయిల్ థెరపీ చికిత్స కోసం క్లెయిమ్స్‌ను తిరస్కరించడం లేదా ఖర్చులను తగ్గించడం వంటి సందర్భాలను అధికార యంత్రాంగం చూసిందని, ఈ థెరపీ ప్రయోగాత్మక చికిత్స అనే కారణంతో దీనిని తిరస్కరించినట్లుగా గుర్తించారని Irdai పేర్కొంది.