GST పరిధిలోకి పెట్రోల్, డీజిల్ ధరలు! సీఈఏ సుబ్రమణియన్ ఏమన్నారంటే

మంచిదే, నిర్ణయం వారిదే

పెట్రో ఉత్పత్తులను జీఎస్టీ పరిధిలోకి తీసుకువస్తే ధరలు నియంత్రణలోకి వచ్చే అవకాశముందనే వాదనల నేపథ్యంలో కేవీ సుబ్రమణియన్ ఈ అంశంపై స్పందించారు. పెట్రోలియం ఉత్పత్తుల్ని జీఎస్టీ పరిధిలోకి తీసుకు వచ్చే ప్రతిపాదనకు తాను మద్ధతిస్తున్నానని చెప్పారు. అయితే జీఎస్టీ కౌన్సిల్ మాత్రమే దీనిపై నిర్ణయం తీసుకోవాల్సి ఉంటుందన్నారు.

పెట్రోలియం ఉత్పత్తులను జీఎస్టీలోకి తీసుకురావడం మంచి ప్రతిపాదేనని అయితే, దీనిపై నిర్ణయాధికారం మాత్రం జీఎస్టీ కౌన్సిల్‌దేనని ఫిక్కీ ఎఫ్ఎల్‌ఓ(మహిళా విభాగం) ఆధ్వర్యంలో నిర్వహించిన సమావేశంలో అన్నారు. ఆహార ద్రవ్యోల్బణం కారణంగా దేశంలో ద్రవ్యోల్బణ ఒత్తిళ్లు అధికంగానే ఉన్నాయన్నారు.

కేంద్రమంత్రులు కూడా

పెట్రోలియం ఉత్పత్తులను జీఎస్టీ పరిధిలోకి తీసుకురావాలని ఇటీవల కేంద్ర మంత్రులు ధర్మేంద్ర ప్రధాన్, నిర్మలా సీతారామన్ అన్నారు. వరుసగా పెట్రోల్, డీజిల్ ధరలు పెరగడం సామాన్యులను ఇబ్బందులకు గురి చేస్తోన్న విషయం తెలిసిందే. ముఖ్యంగా డీజిల్ ధరలు పెరిగితే నిత్యావసర ధరలు పెరుగుతాయి. ఇది ప్రజలకు భారం, ప్రభుత్వానికి ఇబ్బందికర పరిణామం.

పెట్రోల్, డీజిల్, గ్యాస్ భారం

పెట్రోల్, డీజిల్ ధరలకు తోడు గ్యాస్ ధరలు కూడా పెరుగుతోన్న విషయం తెలిసిందే. రెండు రోజుల క్రితమే పెట్రోల్ ధరలు పెరిగాయి. గ్యాస్ ధరలు గత రెండు నెలల కాలంలో రూ.200కు పైగా పెరిగింది. ఎల్పీజీ గ్యాస్ సిలిండర్ ఫిబ్రవరి నెలలోనే మూడుసార్లు ఎగిసింది. ఒక్క నెలలోనే రూ.100 పెరిగింది. పెరిగిన డీజిల్ ధరల నేపథ్యంలో పాల ధరలు కూడా పలు ప్రాంతాల్లో పెరగనున్నాయి.