అమెజాన్ సీఈవో బాధ్యత నుండి తప్పుకున్నప్పటికీ... ప్రపంచ కుబేరుడు జెఫ్ బెజోసే

200 బిలియన్ డాలర్ల కుబేరుడు

1995లో అమెజాన్ పేరిట పుస్తకాలు విక్రయించేందుకు ఓ చిన్న ఆన్‌లైన్ సంస్థను స్థాపించిన జెఫ్ బెజోస్ దానిని అంచెలంచెలుగా వృద్ధిలోకి తెచ్చి, ప్రపంచంలోనే అతిపెద్ద ఈ-కామర్స్ సంస్థగా నిలబెట్టారు. నిన్ననే అమెజాన్‌లో 1997లో చేరిన ఆండీ జాస్సీ సీఈవోగా బాధ్యతలు చేపట్టారు.

2003లో అమెజాన్ వెబ్ సిరీస్ ప్రారంభమైనప్పటి నుండి 2016 వరకు ఆ బాధ్యతలు చూసుకున్నారు జాసీ. ఇప్పుడు అమెజాన్ అత్యున్నత పదవిని అలంకరించారు. మరోవైపు ఇప్పుడు జెఫ్ బెజోస్ ఎగ్జిక్యూటివ్ చైర్మన్‌గా, కంపెనీలో అతిపెద్ద షేర్ హోల్డర్‌గా ఉంటున్నారు. 200 బిలియన్ డాలర్ల సంపద కలిగిన మొదటి వ్యక్తి ఇతనే.

బెజోస్ తర్వాత మస్క్

జెఫ్ బెజోస్ 203 బిలియన్ డాలర్లతో ప్రపంచ కుబేరుడిగా నిలిచారు. 186 బిలియన్ డాలర్లతో టెస్లా ఇంక్ వ్యవస్థాపకులు ఎలాన్ మస్క్ రెండో స్థానంలో ఉన్నారు. వీరి కంపెనీల షేర్ల కదలికను బట్టి వీరి సంపద వ్యాల్యూ మారుతుంది. తనకు జూలై 5 సెంటిమెంట్ అని, అందుకే ఆ రోజున బాధ్యతల నుండి తప్పుకున్నట్లు తెలిపారు.

చివరిసారి 81,840 డాలర్ల వేతనం

అమెజాన్ సీఈవోగా జెఫ్ బెజోస్ గత ఏడాది 81,840 డాలర్ల వేతనం అందుకున్నారు. ఇతర కంపెన్షేషన్ రూపంలో 1.6 మిలియన్ డాలర్లు తీసుకున్నారు. ఇతని సంపద పలు దేశాల జీడీపీ కంటే ఎక్కువగా ఉంది. ఇతను అమెరికాలో కొన్నిసార్లు పన్నులు కూడా చెల్లించలేదు. 2007లోనే అతను బిలియనీర్. ఆ సమయంలో పన్ను చెల్లించలేదు.