తగ్గిన చమురు ఉత్పత్తి

డ్రోన్ దాడి కారణంగా రోజువారీ ముడి చమురు ఉత్పత్తి 5.7 మిలియన్ బ్యారెల్స్ తగ్గిన విషయం తెలిసిందే. చమురు ఉత్పత్తిలో దాదాపు సగం తగ్గింది. ఈ ప్రభావం గ్లోబల్‌గా పడనుంది. తగ్గిన ఉత్పత్తి 5 శాతం. కాబట్టి ధరలు పెరిగే అవకాశాలు ఉన్నాయి. సమాచారం మేరకు జాతీయ చమురు సంస్థ సౌదీ ఆరామ్‌కో తన ముడి చమురు ఉత్పత్తిలో మూడింట రెండు వంతులు లేదా 2 మిలియన్ బ్యారెల్స్‌ను సోమవారం నాటికి ప్రారంభించనుంది.

భారత్‌లో రిటైల్ ధరలపై ప్రభావం

ఈ ప్రభావం భారత్‌లో రిటైల్ ధరలపై పడుతుందని చెబుతున్నారు. పెట్రోల్, డీజిల్ ధరలు అంతర్జాతీయ ధరలతో ముడివడి ఉంటాయి. కాబట్టి అంతర్జాతీయంగా ఏ పరిణామం అయినా భారత్‌లో చమురు ధరలపై ఉంటుంది. ప్రస్తుత పరిణామం భారత్‌లో పెట్రోల్, డీజిల్ ధరల పెరుగుదలకు దారి తీస్తుందని చెబుతున్నారు. ప్రస్తుతం భారత ఇంధన అవసరాల్లో 80% దిగుమతుల ద్వారానే తీరుతోంది. అదే సమయంలో మార్కెట్‌లో చమురు సరఫరాకు ఇబ్బందులు కలుగకుండా తమ భాగస్వామ్య దేశాలతో కలిసి పని చేస్తున్నామన్నట్లు అమెరికా ప్రకటించింది.

సోమవారం నిలకడగా ధరలు...

కాగా ప్రస్తుతానికి సోమవారం ధరలు నిలకడగా ఉన్నాయి. హైదరాబాదులో లీటర్ పెట్రోల్ ధర రూ.76.57, డీజిల్ ధర రూ.71.33గా ఉంది. అమరావతిలో పెట్రోల్ రూ.76.31, డీజిల్ రూ.70.73గా ఉంది. విజయవాడలో పెట్రోల్ రూ.75.94, డీజిల్ రూ.70.38గా ఉంది. దేశ రాజధాని ఢిల్లీలో లీటర్ పెట్రోల్ రూ.72.03 వద్ద ఉంది. డీజిల్ ధర రూ.65.43గా ఉంది. ముంబైలో పెట్రోల్ రూ.77.71, డీజిల్ రూ.68.62గా ఉంది. అయితే త్వరలో ధరలు పెరిగే అవకాశాలు లేకపోలేదు.