ఎందుకు నమ్మకూడదు

స్టాక్ మార్కెట్ - ఇది ఏ కామర్స్, ఎకనమిక్స్, స్టాటిస్టిక్స్‌కు అందని ఓ ఎమోషనల్ గేమ్. ఇందులో ప్రతీ ఒక్కరూ తాము గెలుస్తామని ధీమాగా ఉంటారు. కానీ ఎండ్ రిజల్ట్ మాత్రం వేరుగా ఉంటుంది. ప్రతీ ఒక్కరూ.. ఇది తమకు మాత్రమే తెలిసిన స్టాక్ టిప్ అని, ఇది ఎవ్వరికీ చెప్పొద్దని మాట్లాడుకుంటారు. కానీ ఏదైనా స్టాక్ టిప్ తెలిస్తే.. వాళ్లు ఇద్దరికే చెబుతారు. మొదటిది అడిగిన వాళ్లకు, రెండోది అడగని వాళ్లకు. (లాజిక్ అర్థమైందా.. ?!) అంటే మనకు ఏదైనా తెలిస్తే.. నలుగురికీ చెప్పకపోతే మనకు మనశ్శాంతి ఉండదు. అది మానవ నైజం. అందుకే ఎక్కడో అహ్మదాబాద్‌లో మొదలైన స్టాక్ రికమెండేషన్.. అనకాపల్లికో, ఆదిలాబాద్‌లో చేరడానికి రెండు, మూడు రోజులకు మించి సమయం పట్టదు. కొన్ని సందర్భాల్లో గంటల్లోనే ఇది దేశవ్యాప్తంగా పాకిపోతుంది.

విశ్వసనీయత

అయితే ఈ స్టాక్ టిప్‌లో ఎంత విశ్వసనీయత ఉంది అనే అంశాన్నే మనం పరిగణలోకి తీసుకోవాలి. వాస్తవానికి టిప్ ఇచ్చే వాళ్లకు ఏదో ఒక సెల్ఫ్ ఇంట్రెస్ట్ లేకపోతే తప్ప అది బయటకు రాదు. అందుకే అలాంటి వాటిని నమ్మకపోవడమే శ్రేయస్కరం. ఇంకో ముఖ్య విషయం ఏంటంటే.. ఇలా వచ్చే స్టాక్ రికమెండేషన్స్ అన్నీ రూ.50/100 లోపు ఉన్న స్టాక్స్ ఉంటాయి. వీటిల్లో విపరీతమైన యాక్టివిటీ ఉంటుంది. ఒక వేళ రూ.5 నుంచి 10 లోపు ఉన్న స్టాక్ టిప్స్ అయితే మహా క్రేజ్ ఉంటుంది. కొంత మంది ఇన్వెస్టర్లు కూడా వీటిని ఏకంగా 5వేలు, 10వేలు, 20 వేల చొప్పున కొంటారు. ఎందుకంటేవాళ్ల లెక్క ఏంటంటే.. ఒక్క నాలుగైదు రూపాయలు స్టాక్ పెరిగినా వేలకు వేలు డబ్బులు వచ్చిపడ్తాయి కదా అని భావిస్తారు. కానీ ఇలాంటి టిప్స్‌లో డబ్బులు పోయిన సందర్భాలే ఎక్కువ. ఎందుకంటే సదరు స్టాక్ టిప్ మన దగ్గరకు వచ్చే సరికి దాన్ని అంతకు ముందు తక్కువ ధరకు కొన్నవారు లాభాలు మూటగట్టుకుని బయటపడ్తారు.

మరి ఎవరిని నమ్మాలి

స్టాక్ రికమెండేషన్‌కు మనం సెబీ రిజిస్టర్డ్ కంపెనీని ఎంపిక చేసుకోవాలి. అదికూడా పెద్ద కంపెనీలను, పటిష్టమైన రీసెర్చ్ టీం ఉన్న కంపెనీలను చూసుకోవాలి. సదరు స్టాక్‌ను రికమెండేషన్ చేయడం వెనుక హేతుబద్ధత (రేషనేల్) ఏంటో ఉండాలి. ఈపీఎస్ ఎంత, పీఈ ఎంతుంది, గతంలో కంపెనీ పనితీరు ఏంటి, రాబోయే రోజుల్లో విస్తరణ ప్రణాళికలపై సంస్థ యాజమాన్యం ఏం అంటోంది.. వంటి అనేక అంశాలకు స్పష్టమైన సమాధానాలు ఉండాలి. అవన్నీ సంతృప్తి పరిచేవిగా ఉండాలి. అందులోనూ సదరు స్టాక్ ప్రైస్.. అప్పటికే భారీగా పెరిగి ఉండకూడదు. చాలా చాలా ఫ్యాక్టర్స్ పరిగణలోకి తీసుకున్న తర్వాత... మాత్రమే టిప్ రూపంలో వచ్చిన స్టాక్‌ను కొనుగోలు చేయొచ్చు. ఊరికే ఎవరో చెప్పారు కదా.. అని కొంటే మాత్రం నష్టపోకతప్పదు.