IRCTC గుడ్‌న్యూస్, ఆన్‌లైన్‌లో బస్సు బుకింగ్ కూడా... ఇలా చేయండి

న్యూఢిల్లీ: ఇండియన్ రైల్వే కేటరింగ్ అండ్ టూరిజం కార్పోరేషన్ లిమిటెడ్ (IRCTC) ప్రయాణీకులకు గుడ్‌న్యూస్ చెప్పింది. ఆన్‌లైన్ బస్ బుకింగ్ సర్వీస్‌ను ప్రారంభించింది. ఈ సేవలు ఇప్పటికే జనవరి 29న దేశవ్యాప్తంగా ప్రారంభమయ్యాయి. ఈ మేరకు IRCTC శుక్రవారం వెల్లడించింది ఇప్పటి వరకు రైల్వే టిక్కెట్ బుకింగ్, విమానం, ఈ-కేటరింగ్ సర్వీసులకు పరిమితం కాగా ఇప్పుడు బస్సు ప్రయాణీకులకు ఆన్ లైన్ బుకింగ్ సౌకర్యాన్ని అందుబాటులోకి తెచ్చింది.

22 రాష్ట్రాలు, 3 కేంద్ర పాలిత ప్రాంతాలను కవర్ చేస్తూ ఆన్‌లైన్ బుకింగ్ సేవలను ప్రారంభించింది. బస్సు టిక్కెట్ బుకింగ్ కోసం http://bus.irctc.co.in. పేరుతో కొత్త ప్లాట్ ఫాంను అందుబాటులోకి తెచ్చింది. దాదాపు 50,000 ఆర్టీసీ బస్సులతో పాటు ప్రయివేటు బస్సు ఆపరేటర్లతోను ఒప్పందం కుదుర్చుకుంది.

టిక్కెట్ బుకింగ్ ఇలా..

- IRCTC అధికారిక వెబ్ సైట్ http://bus.irctc.co.in. లోకి వెళ్లాలి.
- IRCTC లాగిన్ క్రెడెన్షియల్స్ ఉంటే నేరుగా బస్సు టిక్కెట్లు బుక్ చేసుకోవచ్చు. లేదంటే కొత్త లాగిన్, పాస్‌వర్డ్ అవసరం. బస్సు టిక్కెట్ బుకింగ్ సమయంలో యూజర్ ఈ-మెయిల్ ఐడీ, మొబైల్ నెంబర్ ఇవ్వాల్సి ఉంటుంది.
- పైన సూచించిన వెబ్ సైట్‌లోకి వెళ్లాలి. అందులోని depart fromలో మీరు ఎక్కడి నుండి బయలుదేరాలి అనుకుంటున్నారో వెల్లడించాలి.
- ఆ తర్వాత ఎక్కడికి వెళ్లాలనుకుంటున్నారనే ప్రాంతం పేరును going to లో పేర్కొనాలి.
- ప్రయాణించే తేదీ లేదా రోజు లేదా సమయం వంటి వాటిని పేర్కొనాలి.
- ఆ తర్వాత search bus పైన క్లిక్ చేయాలి.
- మీరు వెళ్లగోరే బస్సును, సీటు నెంబర్‌ను ఎంటర్ చేయాలి.
- డెబిట్ లేదా క్రెడిట్ కార్డు లేదా ఈ-వ్యాలెట్ ద్వారా పేమెంట్ చేయాలి.
- మీకు ఇష్టం వచ్చిన బస్సును, ముందే, సులభంగా బుక్ చేసుకోవచ్చు.
- ఒకేసారి గరిష్టంగా 6గురు ప్రయాణీకులకు టిక్కెట్లు బుక్ చేయవచ్చు.
- కస్టమర్లు తమ పికప్, డ్రాప్ పాయింట్స్, సమయం ఎంచుకోవచ్చు.
- 1800110139 టోల్ ఫ్రీ నెంబర్‌కు ఫోన్ చేసి బుకింగ్‌కు సంబంధించిన సందేహాలను నివృత్తి చేసుకోవచ్చు.
- ఏసీ క్లాస్ టికెట్ పైన రూ.20+జీఎస్టీ, నాన్ ఏసీ క్లాస్ టికెట్ పైన రూ.10+జీఎస్టీ ఛార్జీ ఉంటుంది. పేమెంట్ సేవల సంస్థల ఛార్జీల భారం కస్టమర్లదే.
- ప్రతి ప్రయాణీకుడికి 10 కిలోల వరకు ఒక బ్యాగ్, ల్యాప్‌టాప్ బ్యాగ్, హ్యాండ్ బ్యాగ్ లేదా 5 కిలోల బ్రీఫ్ కేస్ వంటి వాటికి అనుమతి ఉంటుంది.