ఈ జనవరి నుండి అత్యధిక రిటర్న్స్ ఇచ్చిన 5 లార్జ్ క్యాప్ ఫండ్స్

ఫ్రాంక్లిన్ ఇండియా బ్లూచిప్ ఫండ్

ఫ్రాంక్లిన్ ఇండియా బ్లూచిప్ ఫండ్ ఈ ఏడాది ప్రారంభం నుండి 23.40 శాతం రిటర్న్స్ ఇచ్చినట్లు మార్నింగ్ స్టార్ ఏజెన్సీ చెబుతోంది. జనవరి 1, 2021 నుండి ఉత్తమ రిటర్న్స్ అందించిన ఫండ్‌గా దీనిని చెబుతున్నారు. లార్జ్ క్యాప్ కేటగిరీలో అత్యుత్తమ రిటర్న్స్ అందించిన వాటిలో ఇది ముందు ఉంది.

ఫ్రాంక్లిన్ ఇండియా బ్లూచిప్ ఫండ్ నుండి మూడేళ్ల ప్రాతిపదికన 13.44 శాతం రాబడి, 5 ఏళ్ల ప్రాతిపదికన 11.12 శాతం రిటర్న్స్ లభించాయి. ఫ్రాంక్లిన్ ఇండియా బ్లూచిప్ ఫండ్‌లో ప్రతి నెల రూ.1000తో సిప్ ద్వారా ప్రారంభించవచ్చు. అయితే ఇక్కడ ఏ ఫండ్‌ను సిఫార్స్ చేయడం లేదు.

టాటా లార్జ్ క్యాప్ ఫండ్

లార్జ్ క్యాప్ ఫండ్స్‌లో టాటా లార్జ్ క్యాప్ ఫండ్ రెండో స్థానంలో ఉంది. ఈ ఏడాది ప్రారంభమైనప్పటి నుండి అత్యధిక రిటర్న్స్ ఇచ్చిన ఫండ్స్‌లో ఉంది. 2021లో ఇది 20.87 శాతం రిటర్న్స్ అందించింది. ఆసక్తికర అంశం ఏమంటే నెలకు రూ.150తో ఇందులో సిప్ సాధ్యం. టాటా లార్జ్ క్యాప్ ఫండ్ అతిపెద్ద ఫండ్ కాదు. నిర్వహణ ఆస్తులు రూ.1000 కోట్ల లోపు ఉన్నాయి. ఈ ఫండ్ మూడేళ్ల రిటర్న్స్ 12.6 శాతం, అయిదేళ్ల రిటర్న్స్ 11.91 శాతం రిటర్న్స్ ఇచ్చాయి. టాటా లార్జ్ క్యాప్ ఫండ్... ఐసీఐసీఐ బ్యాంకు, HDFC బ్యాంకు తదితర వాటిల్లో ఇన్వెస్ట్ చేసింది.

మహీంద్రా మానులైఫ్ లార్జ్ క్యాప్ ప్రగతి యోజన

మహీంద్రా మానులైఫ్ లార్జ్ క్యాప్ ప్రగతి యోజన ఫండ్ జనవరి 1, 2021 నుండి 19.38 శాతం రిటర్న్స్ ఇచ్చింది. ఈ ఫండ్‌ను 2019లో లాంచ్ చేశారు. ఇటీవలే ప్రారంభమైనందున లాంగ్ టర్మ్ రిటర్న్స్ గురించి అప్పుడే చెప్పలేం. ఈ ఫండ్ అసెట్స్ అండర్ మేనేజ్‌మెంట్ రూ.123 కోట్లు మాత్రమే. నెలకు రూ.1000 ఇన్వెస్ట్ చేయడం ద్వారా సిప్ ప్రారంభించవచ్చు.

నిప్పోన్ ఇండియా లార్జ్ ఫండ్

ఈ 2021లో అత్యంత రిటర్న్స్ ఇచ్చిన నాలుగో కంపెనీ నిప్పోన్ ఇండియా లార్జ్ ఫండ్. ఇది 18.86 శాతం రిటర్న్స్ ఇచ్చింది. ఆసక్తికరంగా ఇందులో కూడా రూ.100తో సిప్‌ను ప్రారంభించవచ్చు. మూడేళ్ల రిటర్న్స్ 13.5 శాతం ఇచ్చింది. వ్యాల్యూ రీసెర్చ్ నుండి దీనికి టూస్టార్ రేటింగ్ ఉంది.

IDBI ఇండియా టాప్ 100 ఈక్విటీ ఫండ్

IDBI ఇండియా టాప్ 100 ఈక్విటీ ఫండ్ మరో లార్జ్ క్యాప్ ఫండ్. ఇది ఈ సంవత్సరం 18.21 శాతం రిటర్న్స్ ఇచ్చింది. ఇక్కడ మరో విషయం గుర్తు పెట్టుకోవాలి. మ్యూచువల్ ఫండ్స్‌లో పెట్టుబడి రిస్క్‌తో కూడుకున్నది. కాబట్టి పెట్టుబడిదారులు జాగ్రత్తగా ఉండాలి. పైన పేర్కొనబడిన అంశాలు వార్షిక ప్రాతిపదికన లేదా ఈ ఏడాది ఆయా ఫండ్స్ ఇచ్చిన రిటర్న్స్ మాత్రమే. కాబట్టి ప్రొఫెషనల్స్‌ను సంప్రదించి, అన్నీ ఆలోచించి ఫండ్స్‌లో ఇన్వెస్ట్ చేయాలి.